19 ноября 2014 г.
Ĕнер район администрацийĕнчи ларусен залĕнче Статистика кунĕ иртрĕ. Районти организацисемпе предприятисен, ял тăрăхĕсен представителĕсемпе Чăвашстат ертỹçисемпе специалисчĕсем тĕл пулчĕç. Пухăннисен умĕнче чăн малтан Патшалăх статистикин Федераци службин Чăваш Республикинчи территори органĕн (Чăвашстат) ертỹçин çумĕ Л.Петрова тухса калаçрĕ, Статистика кунĕн тĕллевĕпе паллаштарчĕ. Ун хыççăн, мероприятисен регламенчĕпе килĕшỹллĕн, секцисем çине пайланса ĕçлерĕç. Л.Петрова Шăмăршăри вăтам шкулăн 10 "А" тата 10 "Б" класĕсенче Статистика урокĕ ирттерчĕ. Район администрацийĕн çуртĕнче ял тăрăхĕсен администрацийĕсенче, бюджет, коммерци, ял хуçалăх учрежденийĕсемпе организацийĕсенче ĕçлекенсемпе фермер хуçалăхĕсен пуçлăхĕсем валли патшалăх статистикин органĕсене бухгалтерин çулталăкри отчетне парас ыйтупа заняти иртрĕ. Чăвашстат представителĕсем çавăн пекех миграци службин районти подразделенийĕнче, ЗАГС пайĕнче, ветслужбăра ĕçлекенсемпе тĕл пулчĕç. Район администрацийĕнче граждансене харпăр-хăй ыйтăвĕсемпе йышăнни, Патшалăх статистикин ыйтăвĕсене çăмăл чĕлхепе ăнлантарса пани те Статистика кунĕ усăллă иртнине çирĕплетет. Статистика кунĕн ĕçне район администрацийĕн пуçлăхĕн çумĕ В.Петьков хутшăнчĕ. ("Шăмăршă хыпарĕ" хаçат корреспонденчĕ Чăвашстат ертỹçин çумĕнчен Л.Петроваран илнĕ интервью хаçатăн çитес номерĕнче пичетленет).
С.ИВАНОВ.