Публикации » "Афганецсем" аса илеççĕ…

25 февраля 2015 г.

Февралĕн 15-мĕшĕнче - Совет Çарĕсене Афганистанран илсе тухнăранпа 26 çул çитнĕ ятпа - Шăмăршăра районти воин-интернационалистсен тĕлпулăвĕ иртрĕ. Малтан вĕсем Афган вăрçинче вилнĕ ентешсен Валерий Кузнецовпа (Кахăрлă Шăхаль) Владимир Михайловăн (Палтиел) вилтăприйĕсем çине чечек кăшăлĕсем хучĕç. Карапай Шăмăршă вăтам шкулĕн хоккей площадкинче "афганецсемпе" ял çамрăкĕсен командисем тĕл пулчĕç. Çивĕч тупăшура "Афганец" команда çĕнтерчĕ. Афган вăрçине хутшăннисем пĕрле пуçтарăнса юлташĕсене тата çапăçури самантсене аса илчĕç, паянхи çамрăксене çарпа патриотизм воспитанийĕ парас ĕçе вăйлатмаллине палăртрĕç. "Тăшман тĕлĕрмест, Тăван çĕршыва хỹтĕлеме пирĕн яланах хатĕр пулмалла", - терĕ воин-интернационалистсен районти Канашĕн председателĕ Геннадий Ельцов.

С.ХАФИЗОВ,

Афган вăрçин ветеранĕ.