18 апреля 2015 г.
Палтиелĕнчи С.Актемова нумаях пулмасть çар штемпелĕллĕ çыру илчĕ. Çак çырăва хĕрарăм васкамасăр уçрĕ, çав вăхăтрах кăштах хумханчĕ те: ара, ăна хăйĕн ывăлĕ службăра тăракан чаç командирĕ çырса янă вĕт-ха.«Хисеплĕ Светлана Валериановна! Сирĕн ывăлăр Анатолий Раççей Çарĕн базинче службăра тăрать, - палăртнă А.Рузинский полковник. - Вăл кĕске хушăрах подразделенире хăйĕн специальноçне лайăх пĕлекен маттур салтак пулса тăчĕ. А.Актемов рядовой çирĕп дисциплинăпа палăрса тăрать, салтак тивĕçне яланах тỹрĕ кăмăлпа пурнăçласа пырать. Сирĕн ывăлăр ыттисемшĕн те ырă тĕслĕх вырăнĕнче. Спортпа та туслă пурăнать вăл. Тăван çĕршывăн шанчăклă хỹтĕлевçине пăхса çитĕнтернĕшĕн сире тав тăватăп, пурнăçра ăнăçу сунатăп».- Чаç командирĕ ывăла мухтаса çырса янă çырăва вуласа тухнă хыççăн куçăмсем те шывланчĕç, - каласа парать Светлана Валериановна. - Шел, командир çырнă йĕркесене ашшĕ, Александр, вуласа савăнаймарĕ - вăл пиртен вăхăтсăр уйрăлса кайнăранпа кăçал вунă çул çитет ĕнтĕ. «Пысăкка пул, ывăлăм, салтака юрăхлă пул! - тесе чĕрçи çинче утьăкка сиктеретчĕ Тольăна ашшĕ...Анатолий службăра спортпа туслă пулнине те асăнса хăварнă командир. Çак ырă пулăм тỹреммĕнех шкулти физкультура учителĕпе çыхăннă. С.Сорокина преподаватель ачасене тĕрлĕ спорт секцийĕсене явăçтарма тăрăшать. Уйрăмах яшсем пысăк тимлĕхре: вĕсем пулас салтаксем-çке-ха. Ỹт-пĕве пиçĕхтерсе ỹснĕ яшсем вара çар службинче маттур салтаксем пулса тăраççĕ. Вĕсенчен пĕри - А.Актемов. Сăмах май каласан, Палтиелĕнчи пĕтĕмĕшле пĕлỹ паракан вăтам шкулта патриот воспитанийĕ парассине яланах пысăк тимлĕх уйăраççĕ. Класс сехечĕсенче, ытти мероприятисенче педагогсем ачасене вăрçă паттăрĕсем çинчен каласа параççĕ, яшсене вара салтака каясси, Тăван çĕршывăн хỹтĕлевçисен ретĕнче тăрасси сумлă тивĕç пулнине ăнлантараççĕ. Ахальтен мар ĕнтĕ шкул выпускникĕсем салтак тивĕçне чыслăн пурнăçлаççĕ.
М.ФИЛАТОВА.
Палтиел ялĕ.