18 апреля 2015 г.
Пĕрремĕш сăвă е калав... Кашни шкул ачиех хăйне çырас ĕçре тĕрĕслесе пăхма ăнтăлать. Пĕрисен ăнăçать пек, теприсен вара килсех каймасть.Пултарулăх тенине кашнинех паман. Пуррине вара пĕтме памалла мар - ăна аталантарма, ăсталăха ỹстерме пулăшмалла. Çакăн пек пулсан кăна, тен, паянхи шкул ачисенчен малашнехи паллă поэт-писательсем çитĕнĕç.Пуянкассинчи пĕтĕмĕшле пĕлỹ паракан тĕп шкулта 3-4 классенче вĕренекенсем те хăйсен малтанхи утăмĕсене тăваççĕ. Паллашар-ха, эппин, вĕсен пирвайхи хайлавĕсемпе.
С.ИШМУЛЛИНА,
Пуянкассинчи пĕтĕмĕшле пĕлỹ паракан тĕп шкулти пуçламăш классен учителĕ.
|
Купăста
Лартрăм та йăран çине,
Ăнса ỹсрĕ купăста.
Мĕнле паттăр,
мĕнле тутлă,-
Çисе пăхма эп ăста.
|
Вĕлле хурчĕ
Вĕлле хурчĕ пыл пухать,
Çынсене савăнтарать.
Утар хуçи Михала
Мухтаса сутать пыла:
«Ылтăн пыл вăл, сиплĕ те,
Чирлеместĕр ак пĕртте!»
...Вĕлле хурчĕ шав вĕçет,
Çынсене телей пиллет.
Юлия АНТОНОВА,4-мĕш класс.
|
|
Питĕ тутлă яшкара...
Кайрăм эпĕ лавккана,
Илтĕм унта купăста.
Качăр-качăр купăста,
Питĕ тутлă яшкара.
|
|
|
Тăван ял
Пирĕн ял - Пуянкасси,
Чăннипех те чи хитри!
Хулари пек çурчĕсем,
Ытарма çук çыннисем.
Шкулăн çурчĕ пит капмар,
Ача сачĕ - юнашар.
Çамрăк ăру çитĕнет,
Тăван ял та çĕнелет.
Сад пахчи - кашни килте,
Шăпчăк юррине итле
!Илтĕнет куккук сасси,
Эх, хитре Пуянкасси!
|
Пуян ял Пуянкасси,
Районта çук ун пекки.
Урамра - ача сасси,
Чечексем - пахчи-пахчи.
Юрататăп ялăма,
Улăштармăп эп ăна.
Халаллатăп сăввăма
Хамăн савнă ялăма.
Данил НИКИФОРОВ,3-мĕш класс.
|
Хăшĕ тутлăрах?
Пурăннă тет купăстапа кишĕр. Вĕсем яланах тавлашнă.- Эпĕ тутлăрах санран, кишĕр.- Çук, эпĕ тутлăрах санран, купăста. Çавăн пек вĕсем пилĕк кун вăрçăннă. Хуçисем таврăннă. Вĕсен купăстаран тунă салат çиес килнĕ. Ашшĕ купăста касса кĕнĕ, амăшĕ - кишĕр. Салат пи-и-итĕ тутлă пулнă.Çапла вара купăстапа кишĕр хушшинчи тавлашу вĕçленнĕ.
Арина КРАСНОВА, 3-мĕш класс.