22 апреля 2015 г.
Чăваш Ен Пуçлăхĕ Михаил Игнатьев апрелĕн 14-мĕшĕнче РФ Правительствин вице-премьерĕ Александр Хлопонин видеоконференци мелĕпе ирттернĕ селектор канашлăвне хутшăннă. Унта кăçал Раççей вăрманĕсенче пушар тухас хăрушлăх палăрмаллах ỹсекен тапхăра ăнăçлă хатĕрленсе ирттерес ыйтусене сỹтсе явнă. Канашлăва РФ çутçанталăк ресурсĕсемпе экологи министрĕн заместителĕ - федерацин Вăрман хуçалăхĕн агенствин ертỹçи Иван Валентик, Раççей МЧСĕн ертỹçисем, РФ субъекчĕсен пуçлăхĕсем, вăрман тĕлĕшпе ĕçлекен влаç органĕсен представителĕсем хутшăннă. Александр Хлопонин вăрман хуçалăхĕн тата вăрман пушарĕсене сирсе ярассин ыйтăвĕсене уйрăмах çирĕп тĕрĕслесе тăнине палăртнă. Вăл тĕрĕслев Раççейĕн 45 регионĕ пушар тухас хăрушлăх ỹсекен тапхăра туллин хатĕрленсе çитменнине, 9 регион вара пачах хатĕр маррине кăтартни çинчен пĕлтернĕ. Чăваш Республики 2015 çулхи пушар тухас хăрушлăх ỹсекен тапхăра хатĕр. Вăрман пушарĕсене сỹнтермелли плансене тата федерацин тата республикăн пушарпа кĕрешекен службисем пĕр-пĕринпе çыхăнса ĕçлессин йĕркине вăхăтра çирĕплетнĕ, вăрман пушарĕсене сỹнтерес ĕçе Раççей МЧСĕн Чăваш Республикинчи Тĕп управленийĕн тата Чăваш Ен ГКЧСĕн вăйĕсемпе хатĕрĕсене явăçтарас ыйтусене пăхса тухнă. Хальхи вăхăтра 102 техника, çав шутра - 56 пушар машини, вăрман патрулĕн 21 комплексĕ, кустăрмаллă 18 трактор, гусеницăллă 4 трактор, 1 бульдозер, 2 мотовездеход ĕçе хатĕр.