22 апреля 2015 г.
АСЛĂ ÇĔНТЕРỸ пулнăранпа 70 çул çитиччен шутлă кунсем çеç юлчĕç. Çавна май районта тĕрлĕрен мероприятисем пулса иртеççĕ. Çак кунсенче кăна-ха, акă, Шăмăршăри пĕтĕмĕшле пĕлỹ паракан вăтам шкулта Чăваш Республикин Социаллă аталану министерстви пуçарнипе Шупашкарти «Асамат» культурăпа курав центрĕ йĕркеленĕ «Ачасене - Аслă Çĕнтерỹ çинчен» картинкăсен выставки Шăмăршă шкулĕнче ĕçлеме тытăнчĕ.Куравра - вăрçă темипе ỹкернĕ картинкăсен 20 репродукцийĕ. Район администрацийĕн пуçлăхĕн çумĕ - социаллă ыйтусемпе ĕçлекен пайĕн ертỹçи В.Петьков палăртнă тăрăх, çакнашкал выставка ачасене патриотизм воспитанийĕ парас ĕçре уйрăмах пысăк пĕлтерĕшлĕ. Тĕлпулăва Шăмăршăра пурăнакан вăрçăпа ĕç ветеранĕ М.Ичанкин, педагогика ĕçĕн ветеранĕсем Н.Смирнова, Ф.Кузнецова, Г.Никишина, С.Шамеева тата Е.Удочкина та килсе çитнĕ. Вĕсен сăмахĕсене шкул ачисем кăсăклансах итлерĕç. Курав экспозицийĕпе кĕçех районти ытти шкулсенче вĕренекенсем те паллашĕç.
М.ЮМАНОВА.