25 апреля 2015 г.
РАÇÇЕЙРИ Литература çулне, Чăваш Енри К.В.Иванов çулталăкне халалласа Шупашкарта, республикăри Наци библиотекинче апрелĕн 16-17-мĕшĕсенче "Хальхи вулакан, телекуравçă тата радио итлекен - ăс-тăн ыйтăвĕсене тивĕçтересси, вĕсене пахалăхлă информаци, литература парса тăрасси" ятпа регионсем хушшинчи форум иртрĕ. Мероприятие "Чăваш Республикинчи Журналистсен союзĕ" обществăлла организаци йĕркелерĕ. Форума Пушкăрт, Марий Эл, Тутар Республикисенчи, Оренбург, Самар, Тюмень, Ульяновск облаçĕсенчи чăваш чĕлхипе тухса тăракан хаçатсен, обществăлла организацисен, наци пĕрлешĕвĕсен тата библиотекăсен представителĕсем хутшăнчĕç. Форумăн пĕрремĕш кунĕнче мероприятие килнисем Шупашкарти паллă вырăнсемпе паллашрĕç, А.Г.Николаев летчик-космонавтăн Мемориал комплекс- не курса çаврăнчĕç, К.В.Иванов ячĕллĕ Чăваш патшалăх академи драма театрĕнче "Ялта" спектакль курчĕç. Наци библиотекинче "Чăваш кĕнекисене хальхи условисенче сарасси" темăпа ĕçлĕ калаçу иртрĕ. Çак темăпа Чăваш Республикинчи Журналистсен союзĕн председателĕ, Чăваш кĕнеке издательствин директорĕ В.Комиссаров, директор çумĕ Н.Яхатина, Чăваш Республикин Вĕрентỹ министерствин пай пуçлăхĕ В.Бычков, Наци библиотекин ĕçченĕ Г.Соловьева, Учколлектор директорĕн çумĕ Е.Петрова тухса калаçрĕç. Апрелĕн 17-мĕшĕнче Наци библиотекин тăваттăмĕш хутĕн- че Чăваш кĕнеке издательствин 2012-2014 çулсенче пичетленнĕ пичет продукцийĕн куравĕ уçăлчĕ. Пысăк залра "Хальхи вулакан, телекуравçă тата радио итлекен _ ăс-тăн ыйтăвĕсене тивĕçтересси, вĕсене пахалăхлă информаци, литература парса тăрасси" ятпа йĕркеленĕ семинарта, ытти регионсенчи хăнасемсĕр пуçне, Чăваш Енри радиопа телевидени, хаçатсен редакцийĕсен, издательствăсен, библиотекăсен ертỹçисемпе сотрудникĕсем, наука ĕçченĕсем, литература критикĕ-сем, влаç органĕсен, культурăпа вĕрентỹ учрежденийĕсен представителĕсем хăйсен шухăшĕсемпе паллаштарчĕç. Семинар ĕçне Чăваш Республикин Министрсен Кабинечĕн председателĕн çумĕ - информаци политикипе массăллă коммуникацисен министрĕ А.Иванов хутшăнчĕ. "Хальхи вă- хăтра çынна нихçанхинчен те ытларах пахалăхлă, пурнăç чăнлăхĕпе çыхăннă тулли информаци кирлĕ, _ палăртрĕ министр. - Ăна сарассинче литература, телевиденипе радио, пресса тата Интернет тĕп вырăн йышăнаççĕ. Чăннипех те пысăк пахалăхлă информаци _ общество аталанăвĕн чи пĕлте- рĕшлĕ пуянлăхĕсенчен пĕри". Малалла В.Комиссаров сăмах илчĕ: "Литература _ çын пурнăçĕн уйрăлми пайĕ, хăйне евĕр фотографийĕ,_ терĕ вăл. _ Массăллă информаци хатĕрĕ вара тĕнче курăмне, обществăлла шухăша йĕркелекен вăй пулса тăрать, вăл информаци культурин никĕс- не хывать, çын аталанăвĕнче те пысăк пĕлтерĕшлĕ. Уйрăмах _ çамрăксене тивĕçлĕ воспитани парассинче. Çавăн пекех библиотекăсемпе клубсем тата шкулсем те çамрăксен ыйтăвĕсемпе ĕçлессинче социаллă-культура институчĕсем пулса тăраççĕ". Чăваш кĕнеке издательствинче пичетлекен литературăн художество пахалăхĕ тата хальхи вулакана тивĕçтерекен кĕнекесем çинчен предприятин тĕп редакторĕ В.Алексеев каласа пачĕ. Наци телерадиокомпанин директорĕ А.Магарин репертуар политикин кăтартăвĕсемпе тата аталанăвĕпе паллаштарчĕ. "Чувашия" ГТРК" ВГТРК филиалĕн директорĕн çумĕ Е.Егорова телерадиокомпанин хальхи репертуарĕ тата малашлăх планĕсем çинче чарăнса тăчĕ. Чăваш патшалăх университечĕн кафедра заведующийĕ Ю.Артемьев профессор илемлĕ литературăпа хальхи çыннăн кăмăл-сипет пуянлăхĕн çыхăнăвĕ, журналистика ĕçĕн ветеранĕ Д.Семенов хаçатсен обществăн кăмăл-сипет пахалăхне аталантарассинчи пĕлтерĕшĕ, "Хыпар" издательство çурчĕн директорĕ-тĕп редакторĕ В.Туркай çак предприятин ĕçĕ-хĕлĕ çинчен каласа пачĕç. Чăваш литературипе таврапĕлỹçисен аксакалĕсем В.Станьял, А.Кипеч, В.Родионов хальхи литература аталанăвне хакланине те пурте тимлĕн итлерĕç. "Урал сасси" хаçатăн тĕп редакторĕ Ю.Михайлов Пушкăрт Республикинчи хальхи вăхăтри пичетпе литературăри ĕç-хĕле тишкерсе тухрĕ. Ульяновск облаçĕнчи "Волга" ГТРКн чăваш телепередачисен редакторĕ, "Эткер" ыркăмăллăх фончĕн ертỹçи О.Мустаев Чăваш Республикинчи Журналистсен союзĕпе Ульяновскри "Эткер" фонд хушшинче ĕçлĕ çыхăнусем йĕркеленнине палăртрĕ. О.Мустаев ЧР Журналистсен союзĕн председательне В.Комиссарова "Эткер" фондăн лауреачĕ пулнине çирĕплетекен Диплом тата кăкăр çине çакмалли знак парса чысларĕ. Семинара вĕçленĕ май, чăвашсен талантлă педагогĕ тата просветителĕ Иван Яковлевич Яковлев çуралнăранпа 167 çул çитнине палăртса мероприятие хутшăннисен делегацийĕ унăн палăкĕ умне чечексен карçинккине хучĕ. Семинар хыççăн "Çамрăксене халалланă сăмах" литературăпа музыка уявĕ пуçланчĕ. Форума хутшăннисем тата Шупашкарти шкулсенче вĕренекенсем, аслă вĕренỹ заведенийĕсенче пĕлỹ пухакан судентсем умĕнче журналистсем, писательсем, художниксем, литературоведсем тухса калаçрĕç, юрăçсем илемлĕ юрăсемпе савăнтарчĕç.
С.ОСИПОВА.