29 апреля 2015 г.
Апрелĕн 21-мĕшĕнче "Россия-24" каналпа "Пирĕн Республика. Тĕп тема" телепрограммăн пĕрремĕш кăларăмне курса савăнтăмăр. Унта Чăваш Республикин Пуçлăхĕ Михаил Игнатьев хутшăнни кăларăма тата та пуянлатрĕ. Мĕн шухăшлаççĕ-ха "Пирĕн Республика. Тĕп тема" телекăларăм пирки районта пурăнакансем? Пирĕн корреспондент тĕрлĕ професси çыннисемпе тĕл пулса калаçнă.
Менир ХАМДЕЕВ,
район пуçлăхĕ, "Искра" СХПК председателĕ:
- Юлашки çулсенче Чăваш Республики, çав шутра пирĕн Шăмăршă районĕ те экономикăра, социаллă пурнăçпа культура сферинче палăрмаллах ỹсĕмсем турĕç. Çак цифрăсене çеç илсе кăтартам: 2011 çултан пуçласа Чăваш Енре пысăк пĕлтерĕшлĕ 100-е яхăн инвестици проектне, çав шутра ют çĕршыв капиталне хутшăнтарса, пурнăçланă, çакă Чăваш Ен экономикине 130 миллиард тенкĕ ытла инвестици явăçтарма, 12 пине яхăн ĕç вырăнĕ йĕркелеме май панă. 2014 çул пĕтĕмлетĕвĕсем тăрăх, Чăваш Енре пĕр çын пуçне 0,7 тăваткал метр пурăнмалли çурт-йĕр хута янă. Ку вăл федерацин Атăлçи округĕнче чи лайăх кăтартусенчен пĕри. Хамăр Шăмăршă районне илсен, 2014 çулта районта 13000 тăваткал метр йышăнакан пурăнмалли çурт-йĕр хута янă. Çав шутра эконом-класс йышшисене 7150 тăваткал метр е 55 процент чухлĕ. Темиçе çул каялла çеç-ха ача сачĕсенчи вырăнсемпе çыхăннă çивĕч ыйтусене татса пама май çук пек туйăнатчĕ. Халĕ вара садик ыйтăвне ăнăçлă татса панă. 2014 çулта кăна 15 çĕнĕ ача сачĕ хута янă. 2015 çулта тата 7 ача сачĕ уçăлмалла. Паян Чăваш Ен халăхĕн 37 проценчĕ физкультурăпа тата спортпа тачă çыхăну тытать. Çак кăтарту пирĕн районта кунтан та пысăкрах тесе шутлатăп. Юлашки çулсенче шкул ачисем çеç мар, çитĕннисем те спортпа туслашнине палăртма кăмăллă. "Пирĕн Республика. Тĕп тема" кăларăма журналистсем питĕ интереслĕ хатĕрленĕ, республика аталану çулĕпе çирĕппĕн утнине яр- уççăн кăтартса панă.
Николай КУПРИЯНОВ,
Чăваш Республикин тава тивĕçлĕ вĕрентекенĕ, Шăмăршă ялĕ:
- Михаил Васильевич Игнатьев физкультурăпа спорта аталантарассишĕн тăрăшнине эпĕ чунтан ырлатăп. Республикăра Тĕнче тата Европа пĕлтерĕшлĕ пысăк ăмăртусем иртеççĕ, çĕнĕрен-çĕнĕ спорт объекчĕсем çĕкленеççĕ. Шăмăршăри "Туслăх" спорт комплексĕ те - юлашки çулсенче хута кайнă объектсенчен пĕри. Кунта спорта аталантарма, халăх сывлăхне тĕреклетме пур условисем те çителĕклĕ. Шăмăршă тăрăхĕнчен чаплă спортсменсем тухасса çирĕп шанса тăратăп. "Пирĕн Республика. Тĕп тема" телекăларăм хатĕрлесе журналистсем питĕ усăллă ĕç тунă.
Геннадий ЧУГУНОВ,
Чукал ял тăрăхĕн администрацийĕн пуçлăхĕ:
- Чăваш Республикин Пуçлăхĕ Михаил Игнатьев хăйĕн сăмахĕнче çакна палăртрĕ: тĕнчери лару-тăрăва пула сиксе тухакан йывăрлăхсене çĕнтерсе экономикăпа социаллă пурнăçа малашне те çирĕп аталантарассишĕн тăрăшăпăр. Эпĕ Михаил Васильевичăн сăмахне умра тăракан пысăк ĕçсене пурнăçлама хавхалантаракан вăй тесе шутлатăп. Халăх пурнăçне лайăхлатассишĕн тăрăшасси влаç органĕсен тĕп тĕллевĕ пулса тăрать. "Пирĕн Республика. Тĕп тема" телекăларăма хатĕрлесе эфира кăларнишĕн журналистсене тав сăмахĕ калас килет.