Публикации » Нумай пурăнăр, сывлăхпа çỹрĕр!

29 апреля 2015 г.

Çак кунсенче Анат Чаткас ялĕнче пурăнакан Лидия Трофимовна Воробьева 90 çул тултарчĕ. Лидия Трофимовна пурнăçăн йывăр та пархатарлă çулĕпе утса тухнă. Тăван çĕршывăн Аслă вăрçин çулĕсенче колхозра ĕçлесе фронта пулăшнă. Вăрçă хыççăн та мĕн ватăличченех колхоз ĕçĕнче тỹрĕ кăмăлпа тăрăшнă. Тăван çĕршыв Лидия Трофимовнăна "Ĕçре палăрнăшăн" тата В.И.Ленин çуралнăранпа 100 çул çитнĕ ятпа кăларнă медальсемпе чысланă. Унăн "Ĕç ветеранĕ" медаль те пур. Хальхи вăхăтра Л.Воробьева хăйĕн ывăлĕн çемйипе тата 97 çула çитнĕ аппăшĕпе Олимпиада Трофимовнăпа пĕрле пурăнать. Çулĕсем нумай пулин те, Лидя аппа кил хушшинчи тата пахчари ĕçсене хутшăнать, килтисене ăслă сăмах каласа та пурăнма хавхалантарать. Ял-йыш хисеплекен çынна юбилей ячĕпе саламлама хаклă хăнасем - район администрацийĕн организацилле пай пуçлăхĕ Лариса Портнова тата Анат Чаткас ял тăрăхĕн специалисчĕ Надежда Пименова килнĕ. Лариса Николаевна тылпа ĕç ветеранне ăшă сăмах каласа Раççей Федерацийĕн Президенчĕн В.В.Путинăн Тав çырăвне пачĕ. Юбиляра хаклă парнепе те чысларĕç.

Н.ФЕДОРОВА.