29 апреля 2015 г.
Нумаях пулмасть Шупашкарта пушар хăрушсăрлăх темипе çыхăннă Пĕтĕм Раççейри ача-пăча фестивалĕн регионсем хушшинчи тапхăрĕн мероприятийĕ иртрĕ. "Талантсем тата вĕсене хисеплекенсем" фестивале Пĕтĕм Раççейри ирĕклĕ пушар обществи йĕркеленĕ. Унăн тĕп тĕллевĕсем: ачасене пушар хăрушсăрлăх йĕркисене вĕрентесси, вĕсем хушшинче илемлĕ пултарулăхпа палăрса тăракансене тупасси тата хавхалантарасси. Çак фестивале Тутарстанри, Марий Эл, Мордва тата Чăваш Республикисенчи творчество ушкăнĕсем - ирĕклĕ пушар дружинисем килчĕç. Пирĕн районтан унта Шăмăршă вăтам шкулĕнчи 4 "Б" класра вĕренекенсем хутшăнчĕç. Тỹрех каламалла: С.В.Юхвитова учительница ертсе пыракан класри ачасем - "Çăлавçăсем" командăра Юлия Александрова, Тахмина Абдуназарова, Дмитрий Антонов, Марсель Алимов, Дмитрий Еремеев, Ильяс Зартдинов, Дарияпа Станислав Маркеловсем пулчĕç - пысăк сцена çинче хăйсене лайăх енĕпе кăтартрĕç. Тăваттăмĕшсем пушар хăрушсăрлăх темипе çыхăннă ыйтусене тулли хуравсем пачĕç, юрă-ташăра та, сценка лартассипе те маттур пулчĕç. Жюри членĕсем фестиваль кăтартăвĕсене пĕтĕмлетсен Шăмăршă вăтам шкулĕн "Çăлавçăсем" команди "Театр искусстви. Литературăпа музыка композицийĕ" номинацире виççĕмĕш вырăна тухни палăрчĕ.
И.КРЫЛОВА.