29 апреля 2015 г.
Район çыннисене сывлăха упрама вĕрентес, вĕсене сывă пурнăç йĕркисем, чир-чĕрĕн пуçламăш паллисем пирки ăнлантарас, вăраха кайнă, уйрăмах чĕрепе юн тымарĕсен чирĕсемлĕ çынсене врач сĕнĕвĕсемпе пурăнма хăнăхтарас тĕллевпе ялсенче Сывлăх шкулĕсем йĕркелени - халăха кирлĕ ырă пулăм. Чĕрепе юн тымарĕсен чирĕсемпе нушаланакан çынсемшĕн врач-терапевт сĕнĕвĕ-канашĕ сывлăш пекех хаклă. Юн çаврăнăшĕн чирĕсемлĕ çынсене юн пусăмĕ виçерен ỹсни пысăк йывăрлăх кỹрсе тăрать. Тухтăр вĕсене сывлăха яланах тимлĕхре тытма, хăйсене хăйсем тĕрĕслесе тăма, кирлĕ пулсан, врач килсе çитиччен, хуть хăш самантра та кирлĕ мерăсем йышăнма вĕрентет. Тĕпрен илсен, Сывлăх шкулĕ - юн пусăмĕ виçерен ỹснипе нушаланакансем валли. Çынсен сывлăхне упрас, вĕсен кун-çулне вăрăмлатас тĕллевпе врач-терапевтсем, район администрацийĕн пуçлăхĕ В.Фадеев çирĕплетнĕ графикпа килĕшỹллĕн, ялсене тухса çỹреме пуçларĕ. Апрелĕн 28-мĕшĕнче Н.Яковлев врач Вырăс Чукалĕнче, Е.Мандрюкова врач Пăчăрлă Пашьелĕнче пулчĕç, ял çыннисене сывлăх енĕпе кирлĕ сĕнỹсем пачĕç, вĕсен ыйтăвĕсене хуравларĕç. Ытти ялсене илсен, врачсем майăн 6-мĕшĕнче - Палтиелĕнче (Н.Яковлев тухтăр), 8-мĕшĕнче - Карапай Шăмăршăра (О.Полковникова тухтăр), 12-мĕшĕнче - Кивĕ Чукалта (Е.Мандрюкова врач), 13-мĕшĕнче - Пуянкассинче (Н.Петрова тухтăр), 14-мĕшĕнче - Кивĕ Шăмăршăра (О.Полковникова), 20-мĕшĕнче - Энтĕрьелĕнче (Н.Петрова), 21-мĕшĕнче - Анат Чаткасра (Н.Яковлев), 26-мĕшĕнче - Улмаллăра (Е.Мандрюкова), 29-мĕшĕнче - Çĕнĕ Тăрăнта (О.Полковникова), июнĕн 3-мĕшĕнче - Виçпỹрт Шăмăршăра (Н.Петрова), 4-мĕшĕнче - Патирекре (Н.Яковлев), 9-мĕшĕнче - Баскакра (Е.Мандрюкова), 11-мĕшĕнче - Ярăславра (Н.Яковлев), 12-мĕшĕнче - Васанта (Н.Петрова), 15-мĕшĕнче - Çĕнĕ Шăмăршăра, 23-мĕшĕнче Хайпăлара (Н.Яковлев) пулаççĕ. Кăмăл тăвакансене, уйрăмах вăраха кайнă, юн пусăмĕ нормăран иртнипе çыхăннă чирсемпе аптăракансене графикпа палăртнă кун ялти медицина учрежденине килме сĕнетпĕр. Врач йĕркелекен Сывлăх шкулĕнче пулни кашни çыншăнах усăллă пулĕ.
И.СМИРНОВА,
район больницин тĕп врачĕ.