29 апреля 2015 г.
- МАН çывăх юлташăмăн кукашшĕ Александр Васильевич Коновалов 1939-1945 çулсенче çар службинче тăнă май 156 сăнỹкерчĕк тунă, - тет Шупашкарта пурăнакан А.Мовчан фотограф. А.Коноваловăн тăшман çарĕсем ăçта вырнаçнине сывлăшран ỹкермелле пулнă. Аэрофотограмметри боецĕсем вăл вăхăтра элита шутланнă. Çак подразделение пурне те илмен. Ун чухне йĕрки çапла пулнă: çар сăнỹкерчĕкĕсемпе карттисене хăйсен çумĕнче тытма юраман. Çавах та А.Коноваловăн альбомĕнче хăшпĕр сăнỹкерчĕксем сыхланса юлнă, вĕсенче Польшăпа Германири пулăмсем те сăнланнă. Вăрçăра хăюлăхпа паттăрлăх кăтартнăшăн Александр Васильевич темиçе медале тивĕçнĕ. Халĕ вăрçă ветеранĕ 92 çулта ĕнтĕ. Çамрăксемпе тăтăшах тĕл пулать вăл, хыçа юлнă йывăрлăхсем çинчен каласа парать, хăй вăрçăра ỹкернĕ сăнỹкерчĕксемпе паллаштарать. Шел, районта ветерансен шучĕ чаксах пырать. Шăмăршăрах, акă, вĕсем темиçен çеç. Çавах та вут-çулăм витĕр тухнă паттăр салтаксем чун-чĕрепе ватăласшăн мар. Тепĕр чухне вĕсем сурансем ыратнине те маннă пек пулаççĕ. Отставкăри А.Коновалов старшина пирки те çакнах каламалла. Нумаях пулмасть Чăваш патшалăх ỹнер музейĕнче "Шăмăршăран Кенигсберга çити" фотокурав уçăлчĕ. Асăннă курава Кенигсберга фашистсенчен хăтарнине халалланă. Александр Васильевич нумай фронтра çапăçнă - Волхов, Сталинград, Прибалтика... Чылай хуласене ирĕке кăларма хутшăннă вăл. Çартан ентешĕмĕр 1946 çулхи январьте çеç таврăннă. А.Коновалов службăра тăнă подразделени вăрттăнлăхра шутланнă, ăна чи яваплă заданисене пурнăçлама шаннă. Кенигсбергăн карттине 40 тăваткал метр çинче ỹкерме пултарни хăйех мĕне тăрать! Шăпах çакă пирĕн çарсене наступление ăнăçлă вĕçлеме май панă. Ветеранăн сăнỹкерчĕкĕсенче унăн вăрçăри юлташĕсен сăнарĕсем те ĕмĕрлĕхех сыхланса юлнă.
И.САВКИНА.