Публикации » Асра тытса

30 апреля 2015 г.

Тăван Çĕршывăн Аслă вăрçи 1418 куна тăсăлнă. Тăватă çула яхăн пынă хаяр вăрçăра пирĕн салтаксемпе офицерсем хăйсен пурнăçне шеллемесĕр паттăррăн çапăçнă. 1945 çулхи майăн 9-мĕшĕнче çак вăрçă пирĕн çарсем чаплă Çĕнтерỹ тунипе вĕçленнĕ.Кивĕ Чукалти Культура çурчĕ çумĕнче «Скандинави утăмĕпе утма кăмăллакансен» клубĕ ĕçлет. Çак клуба çỹрекенсем, пирĕн салтаксем вăрçă çулĕсемпе Атăл патĕнчен пуçласа Берлина çитиччен паттăррăн утса тухнине палăртса тата асра тытса кăçал январьте «1418 çухрăм» акци пуçларĕç. Çак акцие вĕсем Аслă Çĕнтерĕвĕн 70 çулхи юбилейне халалларĕç. Клуб членĕсем кашни кунах Культура çурчĕ умне пухăнаççĕ, урампа, ял тулашĕнче, вăрманта Скандинави утăмĕпе утса çаврăнаççĕ. Вĕсем куллен 10-шар çухрăм хыçа хăвараççĕ. Майăн 9-мĕшĕ тĕлне шăпах 1418 çухрăм утса тухма палăртнă.

Н.ИВАНОВ.