08 мая 2015 г.
«Советская Чувашия» хаçат, «Чувашия» ГТРК тата Чăваш наци телевиденийĕн пĕрлехи проекчĕпе хатĕрленĕ «Пирĕн Республика. Тĕп тема» программăн черетлĕ кăларăмне майăн 5-мĕшĕнче «Россия-1» каналăн регионти эфирĕнче куртăмăр. Хальхинче журналистсем республика ялхуçалăхĕн аталанăвне анлăн çутатнă. Передачăна Чăваш Республикин Пуçлăхĕ Михаил Игнатьев хутшăнчĕ. «Пирĕн Республика. Тĕп тема» кăларăм пирки район çыннисен шухăш-кăмăлне пĕлес тесе, эпир темиçе çынпа курса калаçрăмăр.
В.АЛЕКСЕЕВ,
район администрацийĕн ялхуçалăхĕпе экологи пайĕн пуçлăхĕ:
- «Çурхи кун çулталăк тăрантарать, - терĕ Чăваш Республикин Пуçлăхĕ Михаил Игнатьев Çĕрпỹ районĕнчи ялхуçалăх предприятийĕнче пулнă чух. Михаил Васильевич «Пирĕн Респу- блика. Тĕп тема» кăларăмра çĕр ĕçĕпе выльăх-чĕ рлĕх отраслĕсене аталантарасси паян тĕп тĕллев пулса тăнине уçăмлăн палăртрĕ. Хамăр района илес пулсан, çурхи уй-хир ĕçĕсем пур хуçалăхра та анлă сарăлнă. «Колос» Агрофирма ОООра, «Исток» ОООра, «Восход» СХПКра, «Мир», «Карлинская» Агрофирма ЗАО- сенче, С.Данилов, О.Хлюкин, Г.Макаров, В.Павлов, В.Юнкеров, Н.Угарина, В.Юманов фермерсен хуçалăхĕсенче çурхи ĕçсем вĕçленсе пыраççĕ. Тĕштырăсемпе пăрçа йышши культурăсене акнисĕр пуçне, çĕрулми те лартаççĕ. «Иккĕмĕш çăкăра» пурĕ 1460 гектар лартмалла, 135 гектар пахчаçимĕç акмалла.
О.Хлюкин,
фермер, Карапай Шăмăршă ялĕ:
- «Пирĕн Республика. Тĕп тема» передачăра Чăваш Республикин Пуçлăхĕ Канаш районĕнчи Янклич ялĕнче пулнине куртăмăр. Валерийпе Вера Никоновсем выльăх-чĕрлĕх ĕрчетсе фермер хуçалăхĕн экономикине çĕклеççĕ. Выльăх-чĕрлĕх ĕрчетес тĕлĕшпе ĕçленĕ май, эпĕ çемье выльăх-чĕрлĕх фермисене 2015-2017 çулсенче йĕркелесе аталантармалли программăпа килĕшỹллĕн патшалăх грантне çĕнсе илтĕм. Çак укçапа юхăннă ĕне витине тĕпрен юсаса вĕр-çĕнĕ сăн кĕртрĕмĕр, хальхи ыйтусене тивĕçтерекен оборудовани вырнаçтартăмăр. Фермăра голштински ăратлă 200 пуç ĕне усратпăр. Çак ăратлă ĕнесем çулталăкра 7-8 пин килограмм сĕт антарма пултараççĕ.
С.Данилов,
фермер, Асанкасси ялĕ:
- «Пирĕн Республика. Тĕп тема» передачăра килти хушма хуçалăхсене аталантарас ыйтăва та çивĕч çĕклерĕç. Ку вăл çапла пулмалла та. Акă эпир 7 ĕне усратпăр, куллен 70-80 литр сĕт сутатпăр. Пирĕнни пек çемьесем хамăр ялта та, районта та сахал мар. Çамрăксен вĕсенчен тĕслĕх илмелле. Килти хуçалăхра ĕне, выльăх, сысна, хур-кăвакал, чăх-чĕп, пыл хурчĕсем ытларах усрасан, халăх пурнăçĕ те лайăхланса пырĕччĕ. Ачасем те ĕçчен çитĕнĕччĕç. Республика Пуçлăхĕ Михаил Васильевич Игнатьев кун пирки питĕ тĕрĕс каларĕ тесе шутлатăп.
С.ИВАНОВ калаçнă.