08 мая 2015 г.
Çĕнтерỹ кунне эпир, аслă ăру çыннисем, савăнăçпа та куççульпе паллă тăватпăр. Тăван çĕршывăн Аслă вăрçи çулĕсенче хĕн-асап тỹснĕ çынсемшĕн Çĕнтерỹ уйрăмах хаклă. Вăрçă пуçланнă çул эпĕ вуннăраччĕ. Ман ỹсĕмрисемпе кăштах аслăраххисем - вăрçă ачисем - мĕн кăна курман-ши? 1942- 1944 çулсенчи хăрушă выçлăха ăçтан манайăн-ха? Ялта вĕлтĕрен те юлмарĕ вĕт, çырма-çатра тăрăх çимелли курăк шыраса çỹреттĕмĕр. Хирте те, йĕтем çинче те, фермăра та ачасем ĕçленĕ, аннесемпе пĕрле çурлапа тырă вырнă, вăкăр кỹлсе ака-суха тунă. Хампа пĕрле вăкăрпа кĕлте турттаракансене, вăрман касса йывăç сĕтĕрсе кăларакансене ĕмĕрех манмăп. Владимир Юманова, Василий Убасева, Василий Семенова, Василий Иванова, Михаил Гладкова, Василий Гладкова, Ильдиер Ухтиярова, Анатолий Семенова, çавăн пекех хирте пĕрле тырă вырнă Антонина Кошкинана, Зинаида Иванована, Александра Харзрована, Екате- рина Тимофеевана, Екатерина Бородована тата ыттисене яла- нах аса илетĕп. Вĕсем Çĕнтерĕве çывхартассишĕн чунтан тăрăшса ĕçленĕ. Пирĕн Виçпỹрт Шăмăршă ялĕнчен 300 çынна яхăн Тăван çĕршывăн Аслă вăрçине хутшăннă. Вĕсенчен çурри ытла каялла таврăнаймарĕ. Пирĕн ял çыннисенчен нумайăшĕ Брянск фронтĕнчи 13-мĕш армин 132-мĕш стрелковăй дивизийĕнче, 712-мĕш полкра çапăçнă. Курск пĕккишĕн пынă хаяр çăпăçусем вăхăтĕнче нимĕçсем пирĕн çарсен пĕр ушкăнне ункăна çавăрса илнĕ. Çак ункăран совет салтакĕсемпе офицерĕсем çав тери пысăк паттăрлăх кăтартса, çухатусем тỹссе тухма пултарнă. Акă вĕсем, Курск пĕкки патĕнче çап-çамрăклах паттăрла вилĕмпе вилнĕ ентешĕмĕрсем: С.М.Фролов, Э.С.Юманов, В.А.Поспелов, В.В.Архипов, И.Г.Яковлев, Т.И.Ухтияров, И.В.Юманов, С.А.Ухтияров, Н.А.Муллин, П.А.Архипов, В.К.Мульдияров, В.Ф.Ямщиков, Д.Г.Тимофеев, В.Ф.Смирнов, Г.М.Харитонов, М.С.Семенов, М.С.Петров, И.М.Убасев, И.А.Крылов, М.В.Гладков, Х.В.Мулендеев. В.П.Ишуков, А.М.Савельев, Н.А.Крылов, Н.С.Падиаров, В.В.Марков, Н.С.Кузьмин, Н.Я.Яковлев (СССР халăх артисчĕн В.Н.Яковлевăн ашшĕ). Çак Виçпỹрт Шăмăршă чăвашĕсемпе пĕрле пирĕн районти Энтерьĕл çыннисем те пулнă, вĕсем пурте тăшманпа паттăррăн çапăçса вилнĕ. Вăрçă паттăрĕсен ячĕсем - пирĕн чĕрере. Вĕсен çывăх тăванĕсем, ачисем, мăнукĕсем фронтра пуçĕсене хунисене асрах тытаççĕ. Çулсем иртĕç - Çĕнтерỹ чапĕ нихăçан та сỹнмĕ!
П.ПАДИАРОВ,
ĕç ветеранĕ,
отставкăри старшина,
«Победа» колхозăн хисеплĕ колхозникĕ.