13 мая 2015 г.
Шăмăршăри Пионер тăкăрлăкĕ пысăк мар, пурĕ те темиçе килĕ çеç. Çак урамра пурăннă май, ветерансемпе тăтăш курса калаçатăп. Акă А.В.Коновалов фронтовикпа Д.Н.Дмитриева тыл ĕçченĕ, тахçанах 90 çул урлă каçнă пулин те, çивĕч ăслă-ха. Аслă Çĕнтерỹ 70 çул тултарнă ятпа район центрĕнче иртекен савăнăçлă митинга ветерансем кăкăр тулли наградăпа пычĕç. Пĕтĕм Раççейĕпех йĕркеленĕ «Вилĕмсĕр полк» акцие хутшăнса, Шăмăршă ачисем кашниех вăрçăра вилнĕ е киле таврăнсан çĕре кĕнĕ çывăх тăванĕсен фотопортречĕсене йăтнă. «Пурте тенĕ пекех - палланă çынсем, нумайăшĕ пурнăçран ытла та ир уйрăлса кайрĕ», - сăнỹкерчĕксем çине пăхнă май ассăн сывласа сăмахларĕ манпа пĕрле район администрацийĕн çурчĕ еннелле утакан А.В.Коновалов фронтовик. Çĕр-çĕр çын пухăннă митинга: ĕçпе вăрçă ветеранĕсем, ĕç коллективĕсем, çамрăксемпе шкул ачисем... Уяв колонни, Шăмăршăри аслă урампа утса пынă май, Совет Союзĕн Геройĕ В.И.Уруков, граждан вăрçин паттăрĕ И.С.Космовский палăкĕсемпе пограничниксене асăнса лартнă обелиск умне чечек кăшăлĕсем хучĕ. Çĕнтерỹ палăкĕ умĕнчи савăнăçлă митинга район администрацийĕн пуçлăхĕ В.П.Фадеев уçрĕ. «Çак чаплă уява эпир чун-чĕрери савăнăçпа тата вăрçăран таврăнайманнисемшĕн хурланса паллă тăватпăр, - терĕ Валерий Петрович. - Аслă вăрçа Шăмăршă районĕн 5100 çынни хутшăннă, вĕсенчен 2330- ĕшĕ пирĕн телейлĕ пурнăçшăн, Тăван çĕршывăн никама пăхăнманлăхĕшĕн кĕрешсе пуçĕсене хунă. Çак уяв пирĕн халăхăн виçесĕр паттăрлăхĕпе хастарлăхне, пысăк хăюллăхĕпе çирĕп чун хавалне тата вăл Тăван çĕршыва хĕрỹллĕн юратнине витĕмлĕн сăнарлакан çутăран çутă символ пулса тăрать». Митингра Шăмăршă ял тăрăхĕн пуçлăхĕн ĕçĕсене туса пыракан Н.И.Дмитриев, Тăван çĕршывăн Аслă вăрçине хутшăннă, орденсемпе медальсен кавалерĕ А.В.Коновалов, Чăваш Республикинчи экологи тата çутçанталăк ресурсĕсен министрĕн çумĕ Е.В.Юшин, Улатăр епархийĕн Шăмăршăри Христос Çурални ячĕллĕ чиркỹ прихучĕн настоятелĕ Николай атте, ветерансен районти Канашĕн председателĕ П.И.Фомин, Шăмăршăри вăтам шкулăн 11 класĕнче вĕренекен, Раççей çарне службăна кайма хатĕрленекен Н.Шиллер сăмах илчĕç, Аслă Çĕнтерỹ 70 çул тултарни çав тери пысăк пĕлтерĕшлĕ, нихçан манăçми событи пулнине палăртрĕç. Пурне те çирĕп сывлăх, вăрăм кунçул сунчĕç. «Çынсем, кĕрешĕр çирĕп миршĕн, ача кулли пек ырă иршĕн», - çапла чĕнсе каларĕ митинга пухăннă çĕр-çĕр çынна Н.Шиллер призывник.Палăк умне чечек çыххисем хунă хыççăн вăрçă паттăрĕсене асăнса пурте пĕр минут шăп тăчĕç. Çак шăплăха паттăрсен ячĕпе автоматран виçĕ хутчен пени çеç татрĕ.Митинга уяв концерчĕ илем кỹчĕ. Вăрçă çулĕсенчи юрă-кĕвĕ янăрарĕ, Çĕнтерĕве мухтакан сăвăсем те чуна хумхантарчĕç. Палăк çумĕнче ларакан ветерансем, куççулĕсене шăла-шăла, илемлĕ те телейлĕ çамрăк ăрушăн чĕререн савăнчĕç. Çĕнтерỹ 70 çул тултарнине халалланă уяв мероприятийĕсем районти кашни ял тăрăхĕнчех чаплă иртнĕ. Вăрçă çулĕсенче фронтра паттăррăн çапăçнисене, тылра хастар ĕçлесе Аслă Çĕнтерĕве çывхартассишĕн пысăк тỹпе хывнă ветерансене - ĕмĕр-ĕмĕр мухтав! Вилнисене асра тытар, чĕррисене пысăк хисеп тăвар.
И.САЛАНДАЕВ.