13 мая 2015 г.
Редакци Республикăри Министерствăсен ертỹçисенчен интервью илесси йăлана кĕчĕ ĕнтĕ. Хальхинче пирĕнпе Чăваш Республикин Вĕрентỹпе çамрăксен политикин министрĕ В.ИВАНОВ калаçма кăмăл турĕ.
- Владимир Николаевич, халĕ экономикăри лару-тăру пирки тĕрлĕрен калаçаççĕ. Сăмах май пĕр ыйту: вĕрентỹ тытăмĕнче кăçал мĕнлерех проектсем пур? Кашни ĕç укçапа çыхăннă-çке-ха...
- Халăха вĕрентес ĕç - Патшалăхăн приоритетлă тĕллевĕсенчен пĕри. Аса илтерем: юлашки çулсенче вĕрентỹ ĕçне аталантарас ĕçе укçа уйăрасси палăрмаллах ỹсрĕ. 2009 çулхипе танлаштарсан, бюджет 1,8 хут ỹснĕ, пĕлтĕр 14,9 миллиард тенкĕпе танлашнă. Ку тĕлĕшпе республикăра туса ирттерекен ĕçсене Раççей Федерацийĕн Вĕрентỹпе наука министерствин министрĕ Д.Ливанов та пысăк хак панă. Вăл палăртнă тăрăх, Чăваш Ен - регионсем хушшинче чи лайăххисенчен пĕри. Кунта, паллах, Чăваш Республикин Ертỹçин тỹпи те пысăк. Д.Ливанов каланă тăрăх, пирĕн республикăра шкул çулне çитмен ачасене хушма вырăнсем туса парас тĕлĕшпе йышăннă федераци программине пурнăçлас тĕлĕшпе те ăнăçлă ĕçлеççĕ. Юлашки тăватă çул хушшинче кăна, тĕслĕхрен, 19,6 пин хушма вырăн хатĕрленĕ, 6,5 пин вырăнĕ - çĕнĕрен хута янă ача сачĕсенче. Çак ĕçсене пурнăçлама виçĕ миллиард тенкĕ ытла уйăрнă. Шкул çулне çитмен ачасене пĕлỹ парас ĕçе модернизаципе килĕшỹллĕн районта виçĕ çултан аслăрах ачасене ача сачĕсене вырнаçтарнă. 2014 çулта, «Единая Россия» партин социаллă проектне пурнăçласа Чăваш Енре хĕрĕх спорт залне юсанă, урамсенчи икĕ спорт сооруженине йĕркеленĕ, вăл шутран пĕри - Пăчăрлă Пашьелĕнчи пĕтĕмĕшле пĕлỹ паракан вăтам шкулта. Кăçал, республика Раççейри конкурсра çĕнтернĕ май, ялсенчи тата 29 шкулти спорт залĕсене тĕпрен юсама палăртнă. Вĕсенчен пĕри - Шăмăршă шкулĕ. Виçпỹрт Шăмăршăри пуçламăш шкул-ача сачĕ те çĕнелсе улшăнас шанăç пур.
- Аслă Çĕнтерỹ кунне анлăн уявларăмăр. Çавна май çакнашкал ыйту: районта ачасемпе çамрăксене патриот воспитанийĕ парас ĕçе мĕнлерех хакланă пулăттăр?
- Уяв умĕнхи мероприятисене асăнса та пĕтереймĕн: «Ăрусен астăвăм эстафети», «Салют, Çĕнтерỹ!», шкулсен музейĕсен фестивалĕ, республикăри тĕрлĕ шайри конкурссем... Чи пĕлтерĕшли - çамрăк армеецсен «Зарница» тата «Орленок» вăййисем. Ку тĕлĕшпе пирĕнтен ырă тĕслĕх илмелли сахал мар. Шăмăршăри пĕтĕмĕшле пĕлỹ паракан вăтам шкулах илер. Кунта кадетсен икĕ класĕ пур, кашниех республика шайĕнчи мероприятисене хастар хутшăнать. Кадетсем «Çĕнтерỹ вальсĕ» конкурсра çĕнтерчĕç. Кăçал республика фестивалĕнче кадетсем, ГТО нормисене пурнăçласа, 20 ылтăн, 4 кĕмĕл значок илме пултарчĕç.
- Калаçушăн тавах.