13 мая 2015 г.
Вĕренỹ çулĕ вĕçленес умĕн Шăмăршăри ача-пăча искусство шкулĕнче çулленех çамрăк музыкантсен отчетлă концерчĕ иртет. Нумаях пулмасть йĕркеленĕ çакнашкал мероприятире вĕсем куракансене чунтанах савăнтарчĕç. Юрă-кĕвĕ ăсталăхне вĕсем хăйсем çине тăрса тăрăшнипе, преподавательсем пулăшнипе хăнăхса пыраççĕ.Концерт кăтартма хутшăннисенчен чылайăшĕ кăçалхи вĕренỹ çулĕнче Искусство шкулĕн чысне районти, республикăри, регионсем хушшинчи тата Пĕтĕм Раççейри фестивальсемпе конкурссенче хỹтĕленĕ. Преподавательсем хăйсен вĕренекенĕсен репертуарне Аслă Çĕнтерĕвĕн 70 çулхи юбилейне халалланă çарпа патриот тематикине те кĕртрĕç. Аккордеонистсемпе гитаристсен ансамблĕсен (илемлĕх ертỹçи С.Кудряшова), вокалистсен тата тĕрлĕ инструментсемпе калакансен вăрçă çулĕсенчи кĕввисене куракансем тимлĕн итлерĕç. Залра ларакансем çавăн пекех пĕчĕккисен «Непоседы», «Веселая компания» ушкăнĕсене те (илемлĕх ертỹçи Т.Яковлева), аслă классенчи вĕренекенсен художество номерĕсене те ăшшăн йышăнчĕç. Музыкантсемпе ташăçăсене интереслĕ программăшăн тав туса вĕсем кăмăллăн алă çупрĕç. Концерта ачасен кăтартуллă «Фламинго» ташă ансамблĕ (ертỹçи В.Кузьмина) тата ачасен «Антонина» халăх ташă коллективĕ (ертỹçи А.Нефедова) хăйне евĕр илемлĕ тĕс кỹчĕç. Искусство шкулĕнче вĕренекенсен тата преподавательсен часах яваплă тапхăр пуçланать. Зачетсенче тата выпускной экзаменсенче вĕренекенсене ăнăçу сунас килет.
Ю.ЦЫГАНОВА.