06 мая 2015 г.
Çамрăк чухнех профессие тĕрĕс суйласа илнĕ, ĕмĕрĕпех юратнă ĕçре вăй хуракансем - чăннипех те телейлĕ çынсем. Вĕсенчен пĕри - районти тĕп больницăри М.Морозова. Мая Николаевна сиплев учрежденийĕнче пĕр улшăнми 33 çул ĕçлет ĕнтĕ. Хайпăлара çуралса ỹснĕ, Челябинскри медицина училищине пĕтернĕ çамрăк специалистăн ĕç биографийĕ 1981 çулта çак хулари больницăра пуçланнă. Унта вăл хирурги уйрăмĕн медсестринче вăй хунă. Ырă кăмăллă, пурне те пĕлме тăрăшакан тата ĕçре вăр-вар специалиста коллективра тỹрех килĕштернĕ. Мая Николаевна малалла та çак уйрăмрах ĕçлеме юласса çирĕп шаннă ĕçтешĕсем. Анчах та пĕр çулталăкран тăван яла отпуска килсен çамрăк специалистăн чун-чĕри çуралнă кĕтес еннеллех туртăннă, вăл районтах ĕçлеме юлма ĕмĕтленнĕ. Çавна май хĕр ĕç ыйтăвĕпе отпуск вĕçленичченех район больницине килнĕ. Г.Беляев тĕп врач ăна ăшшăн йышăннă, район больницинче медицина статистикин медсестринче ĕçлеме сĕннĕ. Хĕр тỹрех килĕшнĕ. Çак службăра Мая Николаевна В.Рекеева медсестрапа, В.Смирнова секретарь-машинисткăпа пĕрле ĕçленĕ. Статистика ĕç-хĕлне чылай çул А.Семкин врач йркелесе пынă. Специалистсем больницăри тĕрлĕ уйрăмсен, ялсенчи фельдшерпа акушер пункчĕсен сиплев ĕçне пĕтĕмлетекен статистика отчечĕсене тỹрĕ кăмăлпа тата вăхăтра туса пынă. В.Рекеевăпа юнашар пĕр улшăнми 22 çул вăй хурсан Мая Николаевна малалла З.Иванова медсестрапа пĕрле ĕçленĕ. Пĕр-пĕрне çур сăмахранах ăнланни яваплă ĕçре ăнăçу кỹнĕ. - 2004 çулта мана тата В.Никифоров врача И.Константинова тĕп врач хăйĕн патне чĕнтерсе илчĕ, больницăра малашне ультра-сасăллă тĕпчев (УЗИ) кабинечĕ уçăласси пирки пĕлтерчĕ, - каласа парать М.Морозова. - Ирина Геннадьевна пире çак службăра ĕçлеме, Шупашкара вĕренме кайма сĕнчĕ. Виталий Афанасьевичпа иксĕмĕр тỹрех килĕшрĕмĕр. Шупашкарта вĕсем çĕнĕ аппаратурăпа ĕçлеме хăнăхсан Шăмăршăри тĕп больницăра УЗИ кабинечĕ ĕçлеме тытăннă. В.Никифоров врачпа М.Морозова медсестра район çыннисене яланах кăмăллăн йышăнаççĕ, вĕсен сывлăхне тĕплĕн тĕрĕсленĕ хыççăн тивĕçлĕ мерăсем йышăнаççĕ. Ультра-сасăллă тĕпчев чир-чĕре тупса палăртма, çийĕнчех ăнăçлă сиплеме май парать. 3 çул каялла, ытти органсемпе пĕрлех, кабинетра чĕрепе юн тымарĕсен чирĕсене те тĕпчеме пуçланă (çак ĕçшĕн Е.Мандрюкова врач-терапевт яваплă). Маларах вара ача амăшĕ пулма хатĕрленекен хĕрарăмсен сывлăхне те тĕрĕслеме тытăннă (куншăн З.Федорова врач-гинеколог ответлă). Чылай çул тỹрĕ кăмăлпа ĕçленĕшĕн М.Морозована Чăваш Республикин Сывлăх сыхлавĕн министерствин, район администрацийĕн, район больницин Хисеп грамотисемпе наградăланă. Çуркуннепе Ĕç уявĕн кунĕнче - майăн 1-мĕшĕнче - Мая Николаевна çуралнăранпа 55 çул çитрĕ. Чаплă юбилей ячĕпе ăна амăшĕ, ывăлĕпе хĕрĕ, тăватă мăнукĕ, тăванĕсем, ĕçтешĕсем, тантăшĕсем ăшшăн саламларĕç, ырлăх-сывлăх сунса чуна ăшăтакан сăмахсем каларĕç.
И.МЕДВЕДЕВ.