16 мая 2015 г.
Виçпỹрт Шăмăршăри А.Юманов шкулта вĕреннĕ çулсенче трактористсем çине ăмсанса пăхнă. Ара, вун-вун тоннăллă хăватлă трактор вĕсен ирĕкне пăхăнать-çке. Тракторист çĕр сухаласа тырă акать, çĕртме сухи тăвать, вăрмантан йывăç кăларать, уй-хирти утă- улăма хĕл кунĕсенче ферма çывăхне турттарать. ...Тракторпа колхозра мĕн пур ĕçе тенĕ пекех тума пулать. «Эх, ỹссен манăн та тракторист пуласчĕ, уй-хирте суха тăвасчĕ!» - çутă ĕмĕтпе çунатланнă Санькка. 1949 çулта Виçпỹрт Шăмăршăри 7 çул вĕренмелли шкултан вĕренсе тухсан А.Юманов тăван ялти «Правда» колхозра ĕçлеме тытăннă, плугарь пулнă. - Эпĕ уй-хирте Ильдиер Ухтияров тата Николай Убасев трактористсемпе пĕрле ĕçлеттĕм, - аса илет Александр Каримович. - Трактор ăнсăртран çĕмĕрĕлсен, эпĕ трактористсемпе пĕрле хаваспах юсав ĕçне пуçăнаттăм. Çак ĕç мана питĕ килĕшетчĕ. Мотора «чун кĕртсен», трактор каллех тỹп-тỹрĕ суха кассисем хăварма пуçласан вара питĕ савăнаттăм. 1951 çулта Шăмăршăри машинăпа трактор станцийĕнче (МТС) трактористсен 3 уйăхлăх курсĕ уçăлсан Санькка унта вĕренме тытăннă. Ыттисемпе танлаштарсан, ăна, техникăна юсама тата руль тытма хăнăхнăскере, вĕренме чылай çăмăлтарах пулнă. Тракторист удостоверенине илсен А.Юманова кустăрмаллă МТЗ трактор шанса панă. «Заря» колхозра (Пуянкассипе Кахăрлă Шăхаль) куккурус акса çитĕнтерес, ăна вырса илсе хуçалăх валли выльăх çими хатĕрлес тĕлĕшпе ĕçленĕ, транспорт ĕçĕсем пурнăçланă. Çак колхозра 5 çул вăй хунă Александр Каримович. Тухăçлă куккурус çитĕнтернĕшĕн ăна ВДНХ Дипломĕпе тата туристсен путевкипе чысланă. Атăл тăрăх пăрахутпа ярăнса çỹренине, илемлĕ хуласемпе паллашнине кăмăллăн аса илет хисеплĕ ĕç ветеранĕ. Малалла вара А.Юманов тăван ялтах - «Правда» хуçалăхра вăй хунă, ял хĕрĕпе - Лидăпа çемье çавăрнă, ача- пăча çуратнă. Гусеницăллă тракторпа уй-хирте сухаланă, çĕре культиваци туса çемçетнĕ, сỹреленĕ, тырă акнă, транспорт ĕçĕсенче çаврăннă. Хушнă ĕçе пенсие тухичченех тỹрĕ кăмăлпа туса пынă Александр Каримович, ĕç пахалăхĕ яланах малти вырăнта тăнă. Ахальтен мар ĕнтĕ ăна «Ĕçри хастарлăхшăн» тата «Ĕç ветеранĕ» медальсемпе наградăланă. Грамотăсемпе, парнесемпе чыслани те ĕçчен те пултаруллă тракториста хавхалану кỹнĕ. Нумаях пулмасть Александр Каримович хăйĕн 80 çулхи юбилейне уявласа ирттерчĕ. Чаплă юбилей ячĕпе ăна юратнă мăшăрĕ, тăватă ачи, мăнукĕсем ăшшăн саламларĕç, ырлăх-сывлăх вăрăм ĕмĕр тата канлĕ ватлăх сунчĕç.
П.ПАДИАРОВ,
ĕç ветеранĕ.
Виçпỹрт Шăмăршă ялĕ.