20 мая 2015 г.
Пĕччен ватăсемпе инвалидсем пурăнмалли уйрăмăн çĕнĕ çурчĕн йĕри-таврашне тирпей-илем кỹрес тĕллевпе экологи субботникĕ иртрĕ. Унта район администрацийĕн тĕрлĕ пайĕсенче ĕçлекенсем, районти социаллă тивĕçтерỹ центрĕнче, Культура керменĕпе тĕп библиотекăра вăй хуракансем хутшăнчĕç.
ХĔРỸ ĕç пуçланас умĕн район администрацийĕн пуçлăхĕ В.Фадеев пурне те субботника тухнă ятпа ăшшăн саламларĕ, ырă та пархатарлă ĕçре хавхаланса вăй хума ăнăçу сунчĕ. Пысăк йыш тỹрех хĕрỹ ĕçе пуçăнчĕ. Пĕрисем çуртăн йĕри- таврашĕнче газон курăкĕ акма çĕр чавса хатĕрлерĕç, теприсем тимĕр картана сăрласа илемлетрĕç, виççĕмĕшсем тăпра куписене сапаласа тикĕлерĕç. Арçынсен пĕр бригади вара карта тулашĕнчи ăпăр- тапăра пуçтарса тирпейлерĕ. Ырă ĕç кунĕпех ăнăçлă та пĕр тикĕс пычĕ. Кунта ĕçлекенсем пĕр-пĕринпе кăмăллăн калаçрĕç, шỹтлерĕç. Пархатарлă ĕç вĕсене савăнăç кỹрсе тăчĕ. Хĕвеллĕ çанталăк лайăх ĕçлеме хавхалантарчĕ. Субботник газон курăкĕн вăрлăхне акнипе вĕçленчĕ. Курăк ешерсен чечексен клумбисене тума палăртаççĕ.
И.АНАНЬЕВ.