03 июня 2015 г.
МАЙĂН 28-мĕшĕнче пирĕн районта пурăнакан, хăй вăхăтĕнче çĕршыв чиккисене сыхланă çынсем Пограничниксен кунне савăнăçлăн паллă турĕç. Вĕсем районти Культура Керменĕ çумĕн- чи паркра пограничниксене асăнса лартнă палăк умне пуçтарăнчĕç. Пограничниксене Шăмăршăри Христос çурални ячĕллĕ чиркỹ настоятелĕ Николай Чувашов протоиерей, "Пограничниксен тăванлăхĕ" обществăлла организацин районти пĕрлешĕвĕн председателĕ Егор Сетриванов ăшшăн саламларĕç, пурнăçра тата ĕçре ăнăçу, çирĕп сывлăх, телей сунчĕç, çамрăк ăрăва патриотла воспитани парас ĕçе хастар хутшăнма чĕнсе каларĕç. Егор Михайлович ветеран-пограничниксене ятарласа хатĕрленĕ медальсемпе чысларĕ. Пограничниксем пурте пĕр кăмăллă пулса Шăмăршăра тăвакан çĕнĕ чиркĕве строительство ĕçĕсене вĕçлеме укçа парса пулăшрĕç. Мероприятие вĕçленĕ май, Шăмăршăсем Комсомольски ялне _ çак районти пограничниксене асăнса лартнă палăка уçнă ятпа ирттерекен митинга çул тытрĕç.
И.МАКАРОВ,
Пограничниксен çарĕн ветеранĕ.