06 июня 2015 г.
Эпĕ пынă чухне Василий Николаевич картишĕнче ĕçлетчĕ. Тирпейлĕ арçын иккенни тỹрех паллă: пур япала та вырăнлă, ниçта та ăпăр-тапăр йăваланса выртмасть. Пỹртре те тирпей-илем савăнтарчĕ. Хитре тĕрĕсем, пур çĕрте те - чечек савăчĕсем. Мĕнле кăна чечек çук- ши кунта? Василий Николаевич Долгова эпĕ ятарласах 50 çул тултарнă ятпа саламлама килтĕм. Ялти хисеплĕ çын вăл, унăн ячĕ район историйĕнче те çырăнса юлнă. 1982 çулта ялти вăтам шкултан вĕренсе тухсан, Вася Ульяновск облаçĕнчи Нагаткинăри СПТУна вĕренме кĕнĕ. Унтан водитель тата тракторист специальноçĕсене илсе тухать. Икĕ çул хушши Совет Çарĕнче службăра тăнă хыççăн тăван яла таврăннă. Ун чухнехи «Ленинская искра» колхозра уй-хир бригадин бригадирĕнче тата сысна фермин заведующийĕнче ĕçленĕ. Заочно вĕренсе Вăрнарти совхозтехникума пĕтернĕ. Ĕçри çитĕнỹсемшĕн Василий Долгова парти тата комсомол райкомĕсен Хисеп Грамотисемпе наградăланă. 1989 çулта вара районти çамрăксем ăна ВЛКСМ 21 съездне кайма делегата суйласа пысăк чыс тунă. Василий Николаевич Мускаври ВДНХ слечĕн участникĕ те пулнă. Виçĕ хутчен ăна Палтиел ял Совечĕн депутатне суйланă. Мăшăрĕпе - Людмила Дмитриевнăпа пĕрлешнĕренпе те часах 25 çул çитет. Вĕсем виçĕ ача çуратса ỹстернĕ. Хальхи вăхăтра Василий Николаевич вахта меслечĕпе Мускава ĕçлеме çỹрет. Ялта та килти хушма хуçалăхне мăшăрсем аталантарсах пыраççĕ. Ĕçчен алăсенче ĕç вĕресе кăна тăрать. - 50 çул - ватлăх мар-ха, - терĕ Василий Николаевич. - Хамăн пурнăçа пĕрре те ỹпкелеместĕп. Яланах тỹрĕ кăмăлпа ĕçлеме тăрăшрăм, çавăнпах ял çыннисем та мана хисеплеççĕ. Сывлăх çеç пултăр! Эпир те çирĕп сывлăх, вăрăм ĕмĕр сунатпăр съезд делегатне.
М.ФИЛАТОВА,
Палтиел ялĕ.