06 июня 2015 г.
Кивĕ Шăмăршăра Çимĕкре ял уявне ирттересси йăлана кĕнĕ ĕнтĕ. Акă кăçал та, иртнĕ шăматкун, вилнĕ тăвансемпе ваттисене сума суса асăнма мĕнпур ял-йыш тата çĕршывăн тĕрлĕ кĕтесĕсенче пурăнакан ентешсем масар çине пуçтарăннипе усă курса ялти хастарсем ял уявне тăваттăмĕш хут йĕркелерĕç.Каç кỹлĕм вара, хĕвел аннă вăхăтра, кившăмăршăсемпе хăнасем кăна мар, таврари ялсенчен те килнĕ халăх ял варринчи лапама пуçтарăнчĕç. «Çимĕк çите пуçласан хĕр те урама пуçтарăнать», - тенĕ халăхра. Асъялсем те ĕлĕкрех çапла, ваттисене асăнмалли кун, Çимĕкре, каçкỹлĕм пирвайхи хут Вăййа (хăш-пĕр районсенче «Тапă» теççĕ), сăвă калама (карталанса юрлама, ташă-такмак калама) тухнă. Мĕн Хăятченех (июнĕн 16-мĕшĕччен), Питрав уявĕчченех пынă вара çак хаваслă вăхăт çамрăксемшĕн. Çак йăла пирĕн ялта паянхи кунччен те пĕтмен-ха, ял халăхĕ, Çимĕк кунĕнче кăна пулсан та, карталанса сăвă калама тухать. Ял уявĕсем те сăвă каланинченех пуçланаççĕ. Чи малтан асъялсене Васан ял тăрăхĕн пуçлăхĕ Юрий Ильин чаплă уяв ячĕпе саламларĕ, малашнехи пурнăçра та ĕçре пысăк çитĕнỹсем тума çирĕп сывлăх, телей сунчĕ. Çак уява йĕркелекен тата ялти тĕрлĕ ĕçсене пурнăçлама пулăшакан ушкăна пуçаруллăхшăн, укçа-тенкĕпе пулăшакансене Эдуард Ларшникова (тĕп спонсорĕ), Алексей Антонова, Владислав Кудряшова, Андрей Ларшникова ыркăмăллăхшăн пĕтĕм халăх ячĕпе тав турĕ. Кăçалхи юбилярсене вара Хисеп хучĕсем парса чысларĕ, малалла та ялти обществăлла пурнăçа хастар хутшăнма ырлăх-сывлăхпа вăрăм ĕмĕр сунчĕ. Малалла спорт ăмăртăвĕсем пуçланчĕç. Кĕске дистанцисене чупса ăмăртма 3 çулхи пĕчĕк ачасенчен пуçласа 60-65 çулхи асаттесемпе асаннесем те хутшăнчĕç. Ялти ратнесепе уйрăм çемьесен эстафети те интереслĕ иртрĕ. Ку ăмăртура 7 командăран Антоновсен çемйи чи маттуртараххи пулчĕ. Иккĕмĕшпе виççĕмĕш вырăнсене Яковлевсемпе ларионовсен çемйисем пайларĕç. Вĕрен туртса тупăшма та ултă ратне хутшăнчĕ. Çивĕч кĕрешỹ хыççăн Антоновсемпе Кудряшовсен ратни 3-мĕш, Ларионовсемпе Ендиеровсем – 2-мĕш, Яковлевсем вара çĕнтерỹçĕсем пулса тăчĕç. Вăй питти каччăсем кире пуканĕ йăтса, алă вăй виçсе те тупăшрĕç уявра. Çĕнтерỹçĕсем те, ăмăртăва хутшăнакансем те хаклă парнесене тивĕçрĕç. Хĕвел анса тĕттĕмленме пуçласан вара яла Шупашкарти паллă эстрада юрăçисем килсе çитрĕç. Пирĕн ентешсем Светлана Яковлевăпа Сергей Кувшинов, Юрий Петуховпа Виктория Захарова юрăç-композиторсем те шăрантарчĕç хăсен юррисене уяв каçĕнче. Тĕп хулара пурăнакан Диана Смирнова (Яковлевсен мăнукĕ) чăваш юррисем шăрантарса, Анна Юманова (Ларионовсен мăнукĕ) инди ташши ташласа тата Константин Иванов çырнă «Нарспи» поэмăн сăввипе çырнă юрра чăвашла илемлĕн юрласа куракансене хăйсен пултаруллăхĕпе тĕлĕнтерчĕ. Уява пухăннисем тутлă шашлăк çисе, тĕрлĕрен пылак шывсем, чăваш сăрипе Çĕхрери çăлкуçран ăсса килнĕ сивĕ те сиплĕ шыв ĕçсе ăшĕсене пусарчĕç. Ял уявĕнче пирвайхи хут сăра хăвăрт ĕçессипе те ăмăрту пулса иртрĕ. Ăмăртăва тухнă сакăр çынран кĕленчери сăрана чи хăвăрт ĕçсе яраканни вара А.Л. пулчĕ, чемпион ятне тата пĕр ещĕк тỹлевсĕр сăра çĕнсе илчĕ. Мĕн сĕм çĕрлечченех ташласа- юрласа, вăйă сăвви каласа савăнчĕ ял халăхĕ. юлашкинчен вара салют янине пăхса киленме те май пулчĕ асъялсен. Уява йĕркелесе ирттернĕшĕн ял тăрăхĕн депутатне, Чăваш халăх ăсчахне тата Чăваш Республикин культурин тава тивĕçлĕ ĕçченне Герман Ларшникова ял-йышсемпе курма килнĕ хăнасем чунтан тав турĕç. Çакна та палăртмалла: уяв умĕн ял урамĕсенче тирпей-илем тăвассишĕн нумай ĕçлерĕмĕр, çак ырă ĕçе вуншар çын хастар хутшăнчĕ. Тирпей-илем тăвас ĕç малалла пырать.
Ю.ИЛЬИН,
ял тăрăхĕн администрацийĕн пуçлăхĕ.