11 июня 2015 г.
Кăçалхи июнĕн 1-мĕшĕнче Чăваш Республикин Пуçлăхĕн «Чăваш Республикин ĕç ветеранĕ ята памалли ĕç стажне чакарасси çинчен» Указĕ вăя кĕчĕ. Хисеплĕ ята тивĕçмелли ĕç стажне хĕрарăмсемшĕн - 37,5, арçынсемшĕн 42,5 çулччен чакарнă.Çак кунсенче кăна-ха «Чăваш Республикин ĕç ветеранĕ» ята парас тĕлĕшпе кăçалхи июнĕн 1-мĕшĕнче тухнă йышăнупа паллашрăмăр. Унпа килĕшỹллĕн пирĕн Шăмăршă районĕнчен «Чăваш Республикин ĕç ветеранĕ » ята Л.К.Архипована, В.Г.Воробьева, А.Н.Дорофеевана, Г.Н.Ефимова, А.З.Захарована, Р.В.Миронована, Р.М.Мударисована, А.И.Полякована, Г.В.Псарована тата Л.А.Ширшлинана панă. Саламлатпăр!Хисеплĕ ята илнисенчен пĕри Л.А.Ширшлина пирĕн корреспондента çапла каланă:- Эпĕ Чăваш Республикин Пуçлăхĕ Михаил Васильевич Игнатьев «Чăваш Республикин ĕç ветеранĕ» ята памалли ĕç стажне чакарнине чунтан ырлатăп.Нумай çул хушши район хаçачĕн редакцийĕнче бухгалтерта ĕçлерĕм, ĕç укçи пысăк пулманнипе пенси те пысăк мар. Ĕç ветеранĕ пулнишĕн уйăхсерен паракан укçа маншăн самаях пулăшу.А.Н.Дорофеева парикмахер та Чăваш Республикин ĕç ветеранĕ ята тивĕçнĕшĕн çав тери савăнни çинчен пĕлтерчĕ. "Патшалăх тăрăшнине курса кăмăл-туйăм çĕкленет, нумай çул пурăнас килет", - терĕ вăл.«Чăваш Республикин ĕç ветеранĕ» ята тивĕçмелли ирĕк пур граждансен ЧР Сывлăх сыхлавĕпе социаллă аталану министерствин «Социаллă пулăшу мерисемпе тивĕçтерекен центр» хысна учрежденийĕн уйрăмне паспорт копийĕ е ăна улăштаракан документ, 3х4 см виçеллĕ пĕр сăнỹкерчĕк памалла.(«Чăваш Республикин ĕç ветеранĕ» ята илме ирĕк пур граждансен мĕнле документсем тăратмалли çинчен эпир «Шăмăршă хыпарĕ» хаçатăн кăçалхи майăн 20-мĕшĕнче тухнă номерĕнче тĕплĕн çырса кăтартнăччĕ).