Публикации » Ĕçе чунпа парăнсан…

20 июня 2015 г.

Кашни çын хăйĕн профессине ачаранах суйласа илет. Н.Мульдиарова та тахçанах медицина ĕçченĕ пулма ĕмĕтленнĕ. Çавăнпах ĕнтĕ вăл 1974 çулта Канашри медицина училищинчи фельдшер уйрăмĕнче вĕренме тытăннă. Алла диплом илсен ăна Шăмăршă районне ĕçлеме янă, Виçпỹрт Шăмăршăри фельдшерпа акушер пункчĕн ертỹçи пулма çирĕплетнĕ. Тивĕçлĕ канăва тухичченех çак ĕçре пулнă вăл.Нина Владимировна ял халăхĕшĕн вырăнти тухтăр вырăннех шутланнă темелле. Çак хушăра миçе çынна малтанхи пулăшу паман-ши вăл? Çил-тăман-и е çумăр, шартлама сивĕ-и - чĕннĕ çĕре васкавлăн çитме тăрăшнă. Унран çынсем çĕр варринче пулăшу ыйтнă тĕслĕхсем те нумай пулнă. Çакна палăртса хăвармалла: Н.Мульдиарова «Районти чи лайăх медицина сестри» хисеплĕ ята пĕрре çеç мар тивĕçнĕ, вăл ертсе пыракан фельдшерпа акушер пункчĕ те районта лайăххисен шутĕнче пулнă.Тивĕçлĕ канăва тухсан та ахаль лармасть Нина Владимировна. Халĕ вăл Васанти медицина пунктĕнче тăрăшать.

З.КРАСНОВА.