23 июня 2015 г.
Шупашкара билетра палăртнă вăхăтран чылай маларах çитрĕм те, чун Атăл хĕррине туртрĕ. Шăрăх: сывлăш температури 30 градусран та çỹллĕрех пулĕ. Компот е чей ĕçсе ăша кантарас тесе, Атăл заливĕ çумĕнчи кафене кĕтĕм. Телей юнашарах çỹрет мар-и: манпа çумри сĕтел хушшинче спорт майкисем çине «Беларус» тесе çырнă хитре каччăсем лараççĕ. Сăмах çумне сăмах, калаçса та кайрăмăр.- Европа чемпионатне киличчен пирĕн патăрта Беларуç Кубокĕшĕн ăмăртусем иртрĕç, - терĕ вăрăмăшне сикекен спортсмен Артем Бондаренко. - Чи маттур каччăсемпе хĕрсене Шупашкара - Европăри командăсен чемпионатне килме суйласа илчĕç. Артем Шăмăршă журналистне хăйĕн юлташĕсемпе - çỹллĕше сикекен Артем Наумовичпа, шăчăпа сикекен Станислав Тивончикпа, йĕтре тĕртекен Павел Лыжинпа, сăнă ывăтакан Владимир Козловпа, мăлатук ывăтакан Олег Дубицкийпе тата ыттисемпе хаваспах паллаштарчĕ. Калаçса ларнă хушăра каччăсем патне хĕрсем те пычĕç. Журналиста Турă чĕлхе панă çав: Беларуç Республикинчи паллă спортсменсемпе Алина Талайпа, Кристина Тиняковскаяпа, Илона Усовичпа, Ирина Яколцевичпа, Алина Дубицкаяпа паллашма пултартăм. Алина йĕтре тĕртекен иккен, Ирина шăчăпа сикет. - Шупашкар - çав тери хитре хула, - терĕç Беларуç спортсменĕсем. - Пирĕн Минск та илемлĕ, çапах та сирĕн патăрта ырă кăмăллă çынсене ытларах тĕл пултăмăр. Атăл хĕрри мĕнешкел илемлĕ тата! Шупашкар хули пирĕн чĕресенче яланах юлĕ.Спортсменсем ăмăртăва васкаççĕ те, текех ыйту парса чăрмантарас темерĕм.
ЕВРОПĂРИ командăсен çăмăл атлетика енĕпе иртекен ăмăртăвĕ тĕп хуламăрти «Олимпийский» стадионта икĕ куна пычĕ. Вулакансене çакна каласа хăварни те вырăнлă пулĕ: «Олимпийский» стадион 15 пин çынна йышăнма пултарать (билетсене пурне те сутса пĕтернĕччĕ). Кунта Тĕнче, Европа тата Раççей пĕлтерĕшлĕ пысăк ăмăртусене ирттерме условисем çителĕклĕ. Халиччен килсе курманнипех пулĕ, стадион маншăн çав тери чаплăн туйăнчĕ. Ăмăртăвăн пĕрремĕш кунĕнче - июнĕн 20-мĕшĕнче - спортăн 40 енĕнчен 21-ĕшĕпе ăмăртрĕç. Çакна палăртма кăмăллă: малтанхи кунах Раççей спортсменĕсем хăйсем Европăра чи малтисен ретĕнче пулнине кăтартса пачĕç. Вăрăмĕшне сикессипе Александр Меньков, çỹллĕшне сикессипе Даниил Цыплаков, виçĕ енлĕ ăмăртура (тройной прыжок) Екатерина Конева, 1560 метра чупассипе Валентин Смирнов, 400 метра барьерсене çĕнтерсе чупассипе Денис Кудрявцев пĕрремĕш вырăн йышăнчĕç.100 метра чупса хĕрсемпе хĕрарăмсем хушшинче Аша Филип (Великобритани), 800 метра чупса Ренель Ламот (Франци), арçынсем хушшинче 100 метра чупса Лемэтр Кристоф (Франци) мала тухрĕç. Ăмăртăвăн малтанхи кунĕн кăтартăвĕсем тăрăх Раççейĕн пĕрлештернĕ командинчи спортсменсем пĕрремĕш вырăн йышăнчĕç. ВЫРСАРНИКУН, кăнтăрла иртсен, командăсен чемпионачĕ малалла тăсăлчĕ. Çакна палăртмалла: Европăри командăсен чемпионачĕ - çулпа чи çамрăккисенчен пĕри, ăна 2009 çултанпа ирттереççĕ. Апла пулин те унăн пĕлтерĕшĕ пысăк. Пекинра иртекен Тĕнче чемпионачĕ умĕн Шупашкар спортсменсен вăйĕсене тĕрĕслемелли экзамен йĕркелерĕ теме те пулать.Паян «Олимпийский» стадионра çĕнĕ рекордсем çураласса, çĕнĕ ятсем палăрасса кĕтрĕмĕр. Кĕтни ахаль пулмарĕ: Раççей спортсменĕсем - Екатерина Конева 14,98 метра сиксе (тройной прыжок), Сергей Шубенков 110 метра барьерсем витĕр 13,22 секкунтра чупса тухса, Денис Кудрявцев 800 метра 48,66 секкунтра чупса (турнир рекорчĕ!) пурне те хыçала хăварчĕç. Пирĕн çĕршывăн тепĕр çамрăк спортсменĕ Валентин Смирнов та 1500 метра чупнă чух финиша пĕрремĕш çитрĕ, хăй хыçĕнчи Марцин Левандовски поляка 0,04 секкунт кая хăварчĕ. Хĕрсен ушкăнĕнче пирĕн Анна Щагина та чи мала тухрĕ. Тăршшĕпе сикессипе те Раççей спортсменĕсене çитекеннисем пулмарĕç. Кунта пирĕн çĕршыв чысне тĕнче пĕлтерĕшлĕ «çăлтăрсем» Александр Меньковпа Дарья Клишина хỹтĕлерĕç. Александр 8,26 метр, Дарья 6,95 метр инçĕшне сикрĕç. Çỹллĕшне сиксе Мария Кучина (1,99 м) тата Даниил Цыплаков Раççей командишĕн хаклă очкосем çĕнсе илчĕç.„Юлашки вуннăмĕш çĕнтерĕве вара 4х400метрлă эстафетăра пирĕн командăри Алена Мамина, Ксения Задорина, Ксения Рыжова тата Мария Михалюк туптарĕç. Чемпионат дисциплинисен çурринче çĕнтерсе Раççей команди пуринчен те мала тухрĕ. Пĕлтĕрхи чемпион Германи команди - иккĕмĕш, Франции команди - виççĕмĕш вырăнта.«Команда хăйне чи лайăх енчен çеç кăтартса пачĕ. Икĕ кун хушшинче хумханмалли нумай пулчĕ, кĕрешỹ питĕ çивĕч иртрĕ. Апла пулин те эпир нимĕçсенчен пĕлтĕр выляса янишĕн реванш илтĕмĕр. Спортсменсем пурте тăрăшрĕç, команда чысне çĕклерĕç», - çакăн пек хак пачĕ Шупашкарти чемпионата Раççейĕн пĕрлештернĕ командин тĕп тренерĕ Юрий Борзаковский. Икĕ кунра çăмăл атлетсем спортăн 40 енĕпе ăмăртрĕç. Раççей команди - 368,5, нимĕçсен - 346,5, французсен - 319,5 балл. Эпĕ ăмăртусем умĕн паллашнă Беларуç спортсменĕсем те япăх мар ăмăртрĕç, вĕсен команди тăххăрмĕш вырăн йышăнчĕ. Çакă командăна Суперлигăрах юлма май пачĕ. Швеци, Финлянди тата Норвеги команди- сем вара иккĕмĕш дивизиона анса ларчĕç. Мĕн тăвăн, спортра чи вăйлисем çĕнтереççĕ, япăхрах кăтартусемпе мала тухма çук.
И.САЛАНДАЕВ.