27 июня 2015 г.
Республика кунне тĕп хуламăрта çеç мар, конкурсра çĕнтернĕ районта та палăртасси йăлана кĕчĕ. Хальхинче ăна Канаш тăрăхĕнче уявларĕç. Вăл Асхва çумĕнчи тỹремре Уй кунне ирттерме хатĕрленĕ инноваци техникисен куравĕнчен пуçланчĕ. Çĕр ĕçне чунтан парăннă специалистсем кунта районсенчен ир-ирех пуçтарăннă. Сухалакан, акакан, выльăх апачĕ хатĕрлекен, тырă выракан, ытти ĕç тăвакан машина- тракторăн 101 тĕсне вырнаçтарнă. Техника куравне ытти çулхинчен пуянрах тăвассишĕн тăрăшни палăрчĕ. Çакна Чăваш Ен Пуçлăхĕн тивĕçĕсене вăхăтлăх пурнăçлакан Михаил Игнатьев уява килсе çитсенех асăрхарĕ. Кураври кашни трактор е комбайн умĕнче чарăна-чарăна тăчĕ, уйрăмлăхĕсемпе паллашрĕ.- Уй-хир ĕçĕн пĕр çĕнтерĕвĕ те çăмăллăн килмест. Районсене тухса çỹренĕ май анасене танлаштаратăп та кăçалхи калча пĕлтĕрхинчен лайăхраххине асăрхатăп. Ку савăнтарать. Выльăх апачĕ хывмалли тапхăр пырать. Ăна ытлă-çитлĕ хатĕрлесчĕ. Куравра çак ĕçе пурнăçламалли техника çителĕклĕ. Хресчен вăл уй-хирте епле ĕçленине курма хăнăхнă.Çĕршывра лару-тăру çăмăл мар пулин те патшалăх кăçал пирĕн агропромышленноç комплексне 2,7млрдтенкĕ(ỹсĕм - 11%) уйăрма палăртнă. Паянхи кун тĕлне 1,2 млрд тенкĕ куçнă (пĕлтĕрхи çак вăхăтран 118%), - терĕ Михаил Васильевич. Канаш енри Республика Кунне РФ Патшалăх Думин вĕренỹ енĕпе ĕçлекен комитечĕн председателĕн заместителĕ Алена Аршинова, Раççей Геройĕ, ЧР Хисеплĕ гражданинĕ Николай Гаврилов генерал-лейтенант, ЧР Патшалăх Канашĕн Председателĕн заместителĕ Олег Мешков, вице- премьер - ялхуçалăх министрĕ Сергей Павлов, Канаш районĕн тата район администрацийĕн пуçлăхĕсем Иван Ивановпа Владислав Софронов хутшăнчĕç. Канаш енĕн çитĕнĕвĕсем курăмлă. АПКра 7,8 пин çын вăй хурать, çăмăллăхлă кредитсем 1690,1 млн тенкĕлĕх илнĕ. Киров ячĕллĕ хуçалăхра 200 ĕне вырнаçмалăх ферма хута янă. Çакă кĕтĕве 550 пуçа çитерме май панă. Хресчен-фермер хуçалăхĕн ертỹçи Валерий Никонов 100 ĕне усрамалăх вите тунă. Пурнăçа кĕртнĕ инвестици проекчĕсем татах пур. 2015-2018 çулсенче 8 проект хута ямалла. Ĕçе тытăннă 6 фермера 2012-2014 çулсенче грантпа пулăшнă. Районта 2005 çултан пуçласа пĕр çын пуçне тивекен тупăш 6 хут ỹснĕ. Республика кунне ирттерме хатĕрленсе 5 млн тенкĕлĕх ĕç тунă. Уяв «Урожай» стадионта иртрĕ. Çатан карта тытса çавăрнă «Пурнăç кустăрми» лапамра чăваш хăлăхĕн ĕлĕкхи пурнăçне сăнлакан картишсем йĕркеленĕ. Кунта юрă- ташă хуçаланчĕ, хаваслă кĕвĕ самантлăха та лăпланмарĕ. Кашни ял тăрăхĕ пурнăçăн пĕр енне сăнларĕ: ача чăкăчĕ, вăй- ăсем, шăпăрлана пĕчĕклех ĕçе хăнăхтарни (самана кирпĕч, кĕлте туни, кĕрпе авăртни, çăпата хуçни, чăваш апатне хатĕрлени, выльăх пăхни...). «Иван Яковлев тата чăваш шкулĕ» картише К.В.Иванов поэт Çулталăкне халалланă. Улах ларни, Сурхури, Салтак ăсатни, Хĕр çураçни, ытти - уйрăм уяв. Ĕçре палăрнисене Михаил Игнатьев патшалăх наградисем пачĕ.
Курав ĕçлет
ИЮНĔН 24-мĕшĕнче Шупашкарти «Олимпийский» спорт комплексĕнчи Пăр керменĕнче Регионсен хушшинчи «Регионсем - чикĕсĕр килĕштерсе ĕçлесси» XXII курав уçăлчĕ. Ăна Чăваш автономи облаçне туса хунăранпа - 95, Шупашкар хулине никĕсленĕренпе - 550, Аслă Çĕнтерỹ - 70, Çĕнĕ Шупашкар хули 55 çул çитнине халалланă. Курав июнĕн 28-мĕшĕччен ĕçлет. Унта 200 яхăн предприяти-организаци хутшăнса хăйĕн продукцине кăтартать. Курава ЧР Пуçлăхĕн тивĕçĕсене вăхăтлăх пурнăçлакан Михаил Игнатьев уçрĕ.
Чăваш Ен вăйлă аталанакан 10 регион йышĕнче
ИЮНĔН 23-мĕшĕнче Шупашкарта «Регионсем: экономика ỹсĕмĕн çĕнĕ çăлкуçĕсем» VIII экономика форумĕ уçăлнă. Унта Итали, Япони, Турци, Англи, Беларуç, Раççей регионĕсен делегацийĕсем хутшăннă. Пĕрлехи ларăва Чăваш патшалăх оперăпа балет театрĕнче Finjecto компани директорĕ Антон Хреков (Мускав) уçса ертсе пынă, форума килме кăмăл тунă хăнасемпе паллаштарнă. «Шупашкарта çуллен экономика форумĕ ирттересси Чăваш Ен пурнăçне кĕрсе вырнаçрĕ. Унта ĕçлĕ çынсем пуçтарăнаççĕ. Унăн аудиторийĕ пур. Чăваш Ен пуриншĕн те уçă регион пулнине, ỹсĕмлĕн аталаннине, унта инженери, телекоммуникаци, транспорт инфратытăмне хывнине, республикăн инвестици климачĕ илĕртỹллине тĕнчене пĕлтересси - пирĕншĕн пысăк пĕлтерĕшлĕ, - тенĕ Республика Пуçлăхĕн тивĕçĕсене вăхăтлăх пурнăçлакан Михаил Игнатьев. - Иртнĕ эрнере Санкт- Петербургра пулнă Пĕтĕм тĕнчери экономика форумĕнче федераци субъекчĕсен инвестици климачĕн рейтингĕн пĕтĕмлетĕвĕпе паллаштарчĕç. Бизнеса ирĕккĕн аталантарма май тунă 10 регион хушшинче Чăваш Ен те пур. Эпир 9-мĕш вырăн йышăнтăмăр». Раççейри Индустри паркĕсен ассоциацийĕн ĕç тăвакан директорĕ Денис Журавский Шупашкарти Индустри паркĕн пĕрремĕш объекчĕсене хăпартма пуçланине ырланă. Михаил Игнатьев вăл пуçарнă калаçăва тăсса çапла каланă: «Паянхи кун тĕлне республикăн - инвестицин 100 проекчĕ. Кашни вăтамран 1,3 млрд тенкĕлĕх. Эпир çуллен цехсемпе заводсем хута яратпăр, çынсем валли пысăк ĕç укçи ĕçлесе илме май паракан вырăнсем йĕркелетпĕр».
Акатуя министр уçнă
ИЮНĔН 24-мĕшĕнче - Республика кунĕнче - Шупашкарти Хĕрлĕ лапамра чаплă лару-тăрура Пĕтĕм чăваш халăхĕн III Акатуйĕ уçăлнă. Чăвашсен çав тери анлă пĕлтерĕшлĕ уявне Чăваш Республикин Министрсен Кабинечĕн Председателĕн çумĕ - информаци политикипе массăллă коммуникацисен министрĕ Александр Иванов уçнă. Александр Степанович республикăра пурăнакансемпе хăнасене пысăк уявпа чун-чĕререн саламланă, тăван халăхăмăрăн ырă йăли-йĕркисене малалла аталантарса пыма ăнăçу, çирĕп сывлăх тата телей суннă.Пĕтĕм чăваш халăхĕн Акатуйне Чăваш Енри, Тутарстанри, Пушкăртстанри, Оренбург, Саратов, Самар облаçĕсенчи 30 ытла пултарулăх коллективĕ илем кỹнĕ. Акатуй спорт вăййисемпе те нумайлăха асра юлĕ.