27 июня 2015 г.
Раççейри Çамрăксен кунне пирĕн çĕршывра кашни çулах июнĕн 27-мĕшĕнче уявлаççĕ. Ăна Раççей Президенчĕн 1993 çулхи июнĕн 24-мĕшĕнчи Указĕпе килĕшỹллĕн çирĕплетнĕ.Чăваш Енри районсемпе хуласенче те Çамрăксен кунне халалласа кашни çулах тĕрлĕ мероприяти ирттереççĕ. Ку уяв умĕн Республика Пуçлăхĕ наукăпа техника, производство, вĕрентỹпе воспитани, культурăпа искусство, сывлăх сыхлавĕ, физкультурăпа спорт тата ытти сферăра пысăк çитĕнỹсем тунă, Чăваш Ен аталанăвне пысăк тỹпе хывнă хĕрсемпе яшсене патшалăх премийĕсене парса чыслать. Чăваш Енре пултаруллă та маттур, хастар та малĕмĕтлĕ çамрăксене тĕрлĕ енлĕн пулăшма тата хавхалантарма тăрăшаççĕ, чи-чи лайăххисене тĕрлĕ стипенди, преми, грант парса чыслаççĕ. Паллă ĕнтĕ: çамрăксен обществăпа политика пурнăçĕнчи позицийĕнчен, вĕсем ыранхи куна шанчăкпа пăхнинчен, хĕр- упраçпа яш-кĕрĕмĕн хастар лăхĕнчен Чăваш Республикин тата пĕтĕм Раççейĕн экономикипе социаллă пурнăçĕ малашне мĕнлерех аталанса пырассинчен килет. Çакна шута илсе ĕнтĕ республика ертỹлĕхĕ хĕрсемпе каччăсен хастарлăхне ỹстерессипе, общество умĕнче тăракан тĕллевсемпе çыхăннă çĕнĕ пуçарусене аталантарма тăрăшать. Пысăк пĕлтерĕшлĕ форумсемпе фестивальсене, конкурссемпе ăмăртусене Чăваш Енре чылай йĕркелеççĕ. Июнĕн 25-мĕшĕнче Шупашкарта регионсен хушшинчи çамрăксен «СОК» 5-мĕш фестивалĕ иртнĕ. Унăн тĕллевĕ - федерацин Атăлçи округĕнчи пултарулăх коллективĕсен хушшинчи культура çыхăнăвĕсене çирĕплетесси, пултаруллă хĕрсемпе каччăсене тупса палăртасси, сывă пурнăç йĕркине пропагандăласси. Районти хĕр-упраçпа яш-кĕрĕме уяв ячĕпе саламланă май вĕсене физкультурăпа спорта юратма, ĕçре ырă тĕслĕх кăтартма чĕнсе калас, хăйсен ĕмĕт-тĕллевне пурнăçа кĕртме ăнăçу сунас килет.