27 июня 2015 г.
Çак кунсенче Чăваш Енри 88 хĕрпе йĕкĕт Самар облаçĕнче федерацин Атăлçи округĕн «iВолга» форумĕн ĕçне хутшăнать. Асăннă мероприятие Раççей Президенчĕн хушăвĕпе - талантлă çамрăксене хăйсем мĕн тума пултарнине туллин кăтартмашкăн тата инноваци идейисене малалла аталантармашкăн пулăшма тивĕçлĕ условисем йĕркелес тесе - ирттереççĕ. Форум вăхăтĕнче çамрăксем хăйсен проекчĕсене хỹтĕлеççĕ. Ку ĕçсене Раççей шайĕнчи профессионал экспертсем хак параççĕ. Чи лайăх проектсем грантсене тивĕçеççĕ.
Наталья НИКОЛАЕВА, Чăваш Ен делегацийĕн ертỹçи:
- Форум умĕн ирттернĕ конкурсра пирĕн республикăран 300 ытла проекта шута илнĕччĕ. Регионти форумра 88 проекта çул пачĕç. Эпир грант пулăшăвĕ илессе шанса тăратпăр.
Евгения АЛЕКСЕЕВА, И.Н.Ульянов ячĕллĕ Чăваш патшалăх университечĕн студентки:
- Пирĕн проект «Чĕлхесен Пĕтĕм тĕнчери фестивалĕ» ятлă. Мĕнле ĕç-ха вăл? Ку проект - халăхсем хушшинчи хутшăнусен уявĕ; пур халăх та пĕр тан пулнине, пур чĕлхе те илемлĕн янăранине кăтартакан уяв.
Наталия ЗУЕВА, Технологипе управлени Академийĕн (Çĕнĕ Шупашкар) аслă преподавателĕ, технологи наукисен кандидачĕ:
- Эпир «Пĕчĕк çĕршывăмра - пысăк майсем» сменăра ялхуçалăх темипе çырнă проектпа хутшăнатпăр. Ялхуçалăх отраслĕн тĕп тĕллевĕ - халăха паха апат-çимĕçпе тивĕçтересси. Пирĕн ĕç сахал энерготăкаксемпех чĕртавар пахалăхне лайăхлатас ыйтăва çивĕч çĕклет.
Роман ВАСИЛЬЕВ, «Политика» смена участникĕ, И.Н.Ульянов ячĕллĕ чăваш патшалăх университечĕн юридици факультечĕн 3 курс студенчĕ:
- Эпĕ иккĕмĕш çул ĕнтĕ «Гражданин» станцийĕнчи вăйă» проектпа хутшăнатăп. Пĕлтĕр пирĕн проект çĕнтерỹçĕ пулчĕ тата эпир Байканура кайма путевка илме тивĕçрĕмĕр. Кăçал çак проекта Атăлçи федераци округĕнчи шкулсенче пурнăçа кĕртес ĕмĕтпе ĕçлетпĕр.
Екатерина УРУСОВА, И.Я.Яковлев ячĕллĕ Чăваш патшалăх педагогика университечĕн 3 курс студентки:
- Форумра эпĕ пĕрремĕш хут çеç. Кунта мана пурте килĕшет. Уйрăмах Ырă ĕçсен кунĕ кăмăла çĕклерĕ. Эпĕ форума «Суйласа илесси - манăн ĕç» проект тăратрăм.
Никита ВЕСЕЛОВ, И.Н.Ульянов ячĕллĕ Чăваш патшалăх университечĕн студенчĕ, «Патриот» смена:
- «iВолгăра» эпĕ иккĕмĕш хут. «Раççейри космос» проектпа килтĕм хальхинче. Форума йĕркелекенсем çамрăксен пултарулăхне аталантарассишĕн нумай тăрăшни савăнтарать.
Татьяна ФУЖЕНКОВА, И.Н.Ульянов ячĕллĕ чăваш патшалăх университечĕн студентки, «Патриот» смена :
- Манăн асăмра июнĕн 22-мĕшĕнчи ир уйрăмах упранса юлĕ: форумра Асăнупа хурлану кунне ирттертĕмĕр. Эпир ирпе 3 сехетрех тăрса «Вилĕмсĕр полк» акци ирттертĕмĕр, вăрçăра вилнисене асăнса шыва чечек кăшăлĕсем ятăмăр. Каçхине вара «Асăну çуртине» çутрăмăр.