01 июля 2015 г.
Пĕтĕм тĕнчери сывлăх сыхлавĕн эксперчĕсем çирĕплетнĕ тăрăх, уртаракан чиртен çулсерен тĕнчере 55 пин çын пурнăçран уйрăлать. Вăтамран кашни 10 минутра - пĕр çын. Çак амака 167 çĕршывра шута илнĕ. Раççейре январь уйăхĕнче кăна çак чирпе аптранă 204 тĕслĕхе шута илнĕ. Чи нумаййи - кỹршĕллĕ Тутарстанра. Чир сарăлнăшăн тилле айăпламалла. Сывă тилĕ нихăçан та çынсем патне тухмасть. Чирлисем çынсенчен пулăшу кĕтеççĕ ахăр. Анчах та виличчен инкек кăтартма та ĕлкĕреççĕ. Вĕсенче хăйсене упраса хăварас туйăм çухалать, пĕр шиксĕр тапăнаççĕ вара. Чирлĕ чĕрчун çыртнипе е унăн сĕлеки сурансем çине лексен ерет ку мур. Урнă чĕрчун канăçсăр, хаярланать, унăн сĕлеки юхсах тăрать, утти улшăнать. Вăл çиме-ĕçме пăрахать, çиме юрăхсăр япаласене çăтма пуçлать. Кун хыççăн чирлĕскер шăнăр туртнипе асапланма тытăнать, ăна шалкăм çапать те вăл вилет. Çавăнпа та сад-пахчана е кил хушшине тискер чĕрчун килсе кĕрсен, выльăхсем хăйсене ытти чухнехинчен урăхла тытма пуçласан ветеринари специалисчĕсемпе çыхăнмаллах. Питрен, пуçран, мăйран, ал-ураран çыртни уйрăмах хăрушă, мĕншĕн тесен кĕлеткен çак пайĕсенче нервсен вĕçĕсем вырнаçнă. Çавна май вирус тĕп нерв тытăмĕнче хăвăртрах сарăлать. Асра тытăр: чир паллисем палăрма пуçласан ăна çĕнтерме йывăрланать е пачах та май юлмасть. Çавăнпа та мура пуçламăш тапхăрта палăртса сиплени питĕ пысăк пĕлтерĕшлĕ. Чĕрчунсем çыртсан сурана тухтăрсене кăтартни хăвăр сывлăхшăнах лайăх. Çийĕнчех прививка тунине нимĕн те çитмест. Чĕрчунсенчен час-часах ачасем шар кураççĕ. Çавăнпа та вĕсене ирĕкри кушак- йытăран аякран иртмеллине ăнлантармалла. Килти выльăха вăхăтра привика туни çак чиртен сыхланма май парать.
Э.ЕГОРОВА,
Чăваш Республикинчи гигиенăпа эпидемиологи центрĕн Патăрьелĕнчи филиалĕн врачĕн пулăшуçи.