Публикации » Елена Городилова: «Шупашкарти чемпионат чăн-чăн спорт уявĕ пек чаплă иртрĕ»

04 июля 2015 г.

 Чăваш  Республикин Пуçлăхĕн тивĕçĕсене вăхăтлăха пурнăçлакан Михаил Игнатьева ячĕпе Елена Городиловаран - Европăри Çăмăл атлетика Ассоциацийĕн медицинăпа допинг контролĕ енĕпе ĕçлекен делегатĕнчен - çыру килнĕ. Унта вăл Европăри çăмăл атлетика енĕпе командăсем хушшинче иртнĕ VI чемпионата Шупашкар тĕлĕнмелле чаплă хатĕрленнине ăшă кăмăлпа палăртать. «Эпĕ Сире ăмăртусене çав тери лайăх хатĕрленнĕшĕн пысăк тав тăвасшăн, - çырать Елена Борисовна. - Европăри Çăмăл атлетика Ассоциацийĕн представителĕсемпе ют çĕршывсенчен килнĕ командăсен членĕсем те çаплах шутлаççĕ. Эпĕ Сире чемпионат уçăлнă кун йĕркеленĕ чаплă концертшăн та чĕререн тав тăватăп, Чăваш Республикинчи çамрăк талантсен пултарулăхĕпе паллашнă чух савăннипе тата хумханнипе куçăмсем шывланчĕç. Хула тата пĕтĕм республика чемпионата чăн-чăн спорт уявĕ пек хавхаланса тата илемлĕ, питĕ чаплă ирттерчĕç». Малалла Елена Городилова чемпионат вăхăтĕнче канма пĕлмесĕр ĕçленĕ медицина сотрудникĕсене те чĕререн тав туни çинчен пĕлтерет. «Эпĕ Европа чемпионатне йĕркелекенсемпе пĕтĕм чăваш халăхĕ умĕнче пуçа таятăп»,- çак сăмахсемпе вĕçлет хăйĕн çырăвне Европăри Çăмăл атлетика Ассоциацийĕн медицинăпа допинг контролĕ енĕпе ĕçлекен делегачĕ Елена Городилова.