08 июля 2015 г.
Июлĕн 8-мĕшĕ - Пĕтĕм Раççейри çемье, юратупа шанчăклăх кунĕ. Ăна паллă тăвасси Авалхи Руçри Муром çĕрĕнче пурăннă Петĕр княçпе унăн Феврония ятлă арăмĕнчен пуçланнă, çак мăшăра халăхра çемье тата кил вучахне хỹтĕлекенсем вырăнне хурса сума сăваççĕ. Вĕсен шăпи яланхи, нихăçан та кивелми халăхсен паллине - ар-арăм шанчăклăхне, хĕрỹ юратăва тата çемье телейне сăнарлать. Çемье пĕлтерĕшĕ калама çук пысăк. Çыннăн тавра курăмĕ шăпах çемьере йăл илсе йĕркеленет, унтах вăл хăйне пурнăçра кирлĕ ăс-пурлăха ăша хывса çитĕнет. Çемье вăл - пирĕн чи çывăх та чи хаклă çыннăмăрсем, пиртен кашниех хамăра чăннипех те телейлĕ туйма кирлĕ пĕчĕк, ырă тĕнче. Ахальтен мар вĕт халăх сăмахлăхĕ: «Çемье пĕрле - чун вырăнта», - тесе палăртать. Карапай Шăмăршă ял тăрăхĕнче туслă та ĕçчен çемьесем чылай. Вĕсенчен пĕри - Петровсен çемйи. Надежда Николаевнăпа Александр Васильевич пĕр çемьене пĕрлешнĕренпе, килĕшỹпе ăнланулăх ытамне кĕнĕренпе 22 çул çитнĕ. Кил хуçи Ульяновск хулинчи «МСОУ-14» АОра строитель пулса ĕçлет. Надежда Николаевна малтан Шупашкарти педагогика училищинчи шкул çулне çитмен ачасен уйрăмне пĕтернĕ, унтан И.Яковлев ячĕллĕ ЧГПУра çав факультета пĕтерсе алла диплом илнĕ. Ун хыççăн шкулта 8 çул организатор пулса ĕçленĕ; «Василек» ача садĕнче 15 çул вăй хунă. Вĕсенчен 10 çулĕ - заведующире. Петровсем 3 чипер хĕр çуратса ỹстереççĕ. Асли - Алиса - «Пакет-Сервис» ООО магазинĕнче оператор пулса ĕçлет, çав хушăрах экономикăпа менеджмент институтĕнче заочно вĕренет. Иккĕмĕшĕ - Анна - çыхăну техникумĕнче (электромеханика колледжĕнче) пĕлỹ пухать, «Прикладная информатика» уйрăмĕн 1-мĕш курсĕн студентки. Кĕçĕнни - Валерия - «Василек» ача сачĕн вăтам ушкăнне çỹрет. Петровсен кил-йышĕ çемье вучахĕн çулăмне нумай çул типтерлĕн сыхласа упрать. Сирĕн килĕрте яланах тăнăçлăхпа килĕшỹ, юрату хуçалантăр, ачасен янăравлă кулли илтĕнсе тăтăр.
А.САВЕЛЬЕВА.