11 июля 2015 г.
Çак хирсенче эпĕ Акатуй умĕн пулнăччĕ. Ун чух чуна савăнтарса калча ешеретчĕ, механизаторсем пысăк тухăç илетпĕрех тесе хавхаланнăччĕ...Анчах хресчен ĕмĕчĕ пурнăçланасси çанталăкран питĕ нумай килет çав. Тырпула акса хăварнăранпа пучах çавăричченех хирсем çумăр курмарĕç, çĕр çуркаланса-çурăлса кайрĕ.- Тỹсме çук шăрăхра хирте тăри те юрлама пăрахрĕ. Тырă икĕ шит çỹллĕшĕнчен ытла ỹсеймерĕ. Юлашки кунсенче çунă çумăрсем тырă тухăçне çĕклеймеççĕ, хăшпĕр хирсенчен акнă вăрлăх чухлĕ пуçтарса илейсен те Турра тав тумалла, - пăшăрханса калаçрĕ «Мир» ЗАО ертỹçи Зефер Афиатуллов. «Мирта» çеç мар, «Искра», «Восход», «Исток» тата ытти хуçалăхсенче те тырра шăрăх вĕтеленĕ. Ахальтен мар ĕнтĕ район администрацийĕн пуçлăхĕ Валерий Фадеев Шăмăршă районĕн территорийĕнче июлĕн 1-мĕшĕнчи 17 сехетрен пуçласа, уйрăм хушу пуличчен, чрезвычайлă лару-тăру режимĕ туса хума йышăннă.Кĕçнерникун Шăмăршă тăрăхĕнче ĕçлĕ çулçỹревпе Чăваш Республикин Министрсен Кабинечĕн Председателĕн çумĕ - Ялхуçалăх министрĕ Сергей Павлов пулчĕ, район администрацийĕн пуçлăхĕпе Валерий Фадеевпа пĕрле хирсене пăхса çỹрерĕç.Сергей Владимирович хирсенчи лару-тăру йывăррине куçпа курса ĕненчĕ. Акă, «Исток» ОООра кĕр тыррисен пысăк лаптăкне выльăх апачĕ хатĕрлеме çулнă, мĕн юлни те гектартан 10 центнертан ытла тухăç параймасть пулĕ. Сĕлĕпе урпа та савăнтармаççĕ. «Мир», «Восход », «Искра» хуçалăхсенче те куçа илĕртекен тырпул курмарăмăр. Районĕпе шăрăхпа-типĕпе вăйлă сиенленнĕ лаптăксем 3 пин гектар ытла пуçтарăнаççĕ. Ялхуçалăх министрĕ, вĕсене тĕплĕн тишкерсе тухса, министерствăна тивĕçлĕ документсем хатĕрлесе пама сĕнчĕ. - Патшалăх ял çыннине йывăрлăхра пăрахмĕ, май пур таран Шăмăршă районне пулăшатпăрах, - шантарчĕ министр. Сергей Владимирович хуçалăхсенче выльăх апачĕ хатĕрлес ĕç лайăх пынипе кăмăллă юлчĕ. Çĕрулмипе куккурус лаптăкĕсем те, нỹрĕк илнĕскерсем, чуна савăнтараççĕ.- Алла усмалла мар, кĕр тыррисене палăртнă чухлĕ акса хăвармалла. Çитес çул хресченшĕн ăнăçлă пуласса шанса пурăнар, - терĕ Сергей Павлов. Çак шухăша Сергей Владимирович район администрацийĕнче çĕр ĕçченĕсемпе ирттернĕ канашлура та палăртрĕ. Министр республикăри агропромышленноç комплексĕ, ытти регионсемпе танлаштарсан, ăнăçлăрах аталаннине цифрăсемпе çирĕплетсе пачĕ. Шăрăх кăнтăр енчи районсене кăна сиен кỹнĕ, пĕтĕмĕшле илсен республикăра тырпул тухăçĕ пĕлтĕрхинчен кая мар пулмалла. Выльăх-чĕрлĕх отраслĕ те малалла аталанать, уйрăмах сысна ашĕпе чăх ашĕ туса илес тĕлĕшпе кăтартусем лайăхлансах пыраççĕ. Сергей Владимирович выльăх-чĕрлĕх йышне, чи малтан сăвакан ĕнесен шутне упраса хăварма чĕнсе каларĕ. Канашлăва пуçтарăннă ял хуçалăх предприятийĕсемпе фермер хуçалăхĕсен ертỹçисем министра ыйтусем чылай пачĕç, тулли хурав илчĕç. Сăмахран, ял çыннисене сĕт хакĕ чакни, çĕрулмине тупăшлă вырнаçтарас тата çамрăксене ялта çирĕплетсе хăварас ыйтусем хумхантараççĕ. Фермерсене патшалăх енчен ытларах пулăшу памалли пирки те калаçрĕç. Суйлав çывхарса килнĕ май, халăх республика «тилхепине» кама шанса памалли пирки те шутлать, паллах.- Пире чăваш çăкăрне çисе, чăваш улăх-çаранĕнче çарран чупса, чăваш çăлкуçĕнчен шыв ĕçсе ỹснĕ, халăхăмăр нушине ăнланакан çын кирлĕ, - терĕ «Колос» Агрофирма» ООО генеральнăй директорĕ Виталий Захаров. Унăн шухăшĕпе пурте килĕшрĕç.
И.САЛАНДАЕВ.
Сăнỹкерчĕкĕ авторăн.