11 июля 2015 г.
«Раççейре, Европăри ытти нумай çĕршывпа танлаштарсан, çанталăк тата климат условийĕсене пула ялхуçалăх производствине йĕркелеме чылай кăткăсрах. Кун пирки пирĕн талăкра 24 сехет хушши шутламалла, сỹпĕлтетỹлĕхпе мухтанчăклăхран хăтăлмалла. Умра - вĕçĕ-хĕррисĕр ĕç. Акă, Чăваш Енре ялхуçалăх производствине рынокри лару-тăрăва шута илсе ăнăçлă аталантараççĕ. Республика кунçул уттинчен юлмасăр пырать.
Çак сăмахсене Раççей Федерацийĕн Ялхуçалăх министрĕ Александр Ткачев Чулхула облаçĕнче июлĕн 7-мĕшĕнче иртнĕ «Атăлçи хир кунĕ - 2015» форумра каланă. Пысăк мероприятие Чăваш Ен Пуçлăхĕн тивĕçĕсене вăхăтлăха пурнăçлакан Михаил Игнатьев та хутшăннă. Форум вăхăтĕнче ФАО агропромышленноç комплексĕн аталанăвĕ енĕпе ĕçлекен эксперт Канашĕн ларăвĕ иртнĕ, унта отрасль аталанăвĕпе çыхăннă çивĕч ыйтусене сỹтсе явнă. Лару ĕçне Раççей Президенчĕн Атăлçи федераци округĕнчи полномочнăй представителĕ Михаил Бабич ертсе пынă. Унсăр пуçне АПК сферинчи, апат-çимĕç тата тирпейлекен промышленноçри çитĕнỹсен, çавăн пекех ăратлă чĕрчунсен тата ялхуçалăх техникин куравĕ иртнĕ. Выставкăна Чăваш Енри ялхуçалăх таварне туса илекенсем те хутшăннă. Çакна палăртмалла: республикăри аграри тытăмне аталантарма патшалăх пулăшасси çултан çул ỹссе пырать. 2015 çул валли ялхуçалăхне аталантарма 2,69 млд. тенкĕ пăхса хăварнă (2014 çулхипе танлаштарсан111%).