11 июля 2015 г.
«Паян Чăваш Ен халăхĕн 37 проценчĕ физкультурăпа тата спортпа тăтăшах çыхăну тытать. Сывă пурнăç йĕркине кăмăллакансене пурне те тав сăмахĕ калатăп». (М.В.ИГНАТЬЕВ Чăваш Республикин Патшалăх Канашне янă Çыруран). ПИРĔН республика - спорта юратакан, çамрăк ăрăва мĕн пĕчĕкрен сывă пурнăç йĕркине хăнăхма вĕрентекен республика. Çакна хамăр район пирки те калама пулать. Кашни шкултах спорт залĕсем ĕçлени те, Шăмăршăра хуларинчен пĕрре те кая мар «Туслăх» спорт комплексĕ пурри те республика тата район пуçлăхĕ- сем сывă пурнăç йĕркишĕн тăрăшнине çирĕплетеççĕ. Спорт объекчĕсене юсаса- çĕнетсе тăрассине те тимлĕхре тытаççĕ. Акă, кăçал Шăмăршăри вăтам шкулти спорт залне юсама республика бюджетĕнчен 1180000 тенкĕ уйăрнă. Хальхи вăхăтра кунта юсав ĕçĕсем пыраççĕ. Тĕп подрядчикĕ - «Сувар» ООО. Объектри ĕçсене кăçалхи августăн 1-мĕшĕ тĕлне вĕçлеме палăртнă. Çавăн пекех Виçпỹрт Шăмăршăри пуçламăш шкул-ача сачĕн спорт залĕпе çурт çивиттине юсама республика бюджечĕпе вырăнти бюджетран 1265206,00 тенкĕ уйăрса панă. Спорт залне юсаса пĕтернĕ ĕнтĕ, часах çивитти те хатĕр пулĕ. Çĕнĕ вĕренỹ çулне хатĕрленнĕ май, шкулсенчи котельнăйсене те юсаççĕ. Чукал, Пуянкасси, Васан шкулĕсемпе Палтиелĕнчи ача садĕнче хурансене улăштараççĕ.
В.АНТОНОВ,
район администрацийĕн вĕрентỹ тата çамрăксен политики пайĕн спорт енĕпе ĕçлекен специалисчĕ.