11 июля 2015 г.
.jpg "Кăмăлĕ ăшă, чунĕ ачаш")
Симĕс улăхлă, сарлака та вĕçĕ-хĕррисĕр вăрманлă, куккук сассиллĕ, хитре те капмар çуртсенче ĕçчен çынсем пурăнакан Пăчăрлă Пашьел ялĕнче шăпах çур ĕмĕр каялла маншăн чи хаклă та çывăх çын - анне - Мария Петровна Левендеева (хĕр чухнехи хушамачĕ Савельева) июль уйăхĕн 9-мĕшĕнче çут тĕнчене килнĕ. Ашшĕпе амăшĕ - Петр Васильевичпа Ольга Федоровна - пĕчĕк хĕр пĕрчи çуралсан питĕ савăннă. Савăнмасăр ара, кăн-кăвак куçлă, сап-сарă çỹçлĕскер, çемьере 3-мĕш ача пулнă-çке! Туслă çемьере Мария мĕн ачаран ĕçе хăнăхса ỹснĕ, пĕр-пĕрне пулăшса пынă. Ỹссе пынă май Маша медицина ĕçченĕ пулма ĕмĕтленнĕ. Вăтам шкула «лайăх» тата «питĕ лайăх» паллăсемпе пĕтернĕ хыççăн 1982 çулта Чĕмпĕр хулинчи фармацевтика колледжне вĕренме кĕрет. 1984 çулта алла диплом илсе районти тĕп аптекăра хăйĕн ĕç биографине пуçлать. Аптека ертỹçи Нина Александровна Декаева çамрăк хĕрĕн пултарулăхĕпе тăрăшулăхне кура çулталăк ĕçленĕ хыççăн аналитик должноçне ĕçлеме куçарать. Аналитик ĕçĕ мĕнле йывăр та яваплă пулнине фармацевтсемпе провизорсем çеç ăнланаççĕ. 25 çул хушши районти аптекăра Мария Петровна аналитик пулса вăй хурать. Ассистентсем хатĕрленĕ сиплĕ шĕвексем чирлисем патне пахалăхлă çитчĕр тата вĕсене хăвăртрах сывалма пулăшчĕр тесе чунне парса тăрăшать Мария. Хăйне шанса панă ĕçе тỹрĕ кăмăлпа пурнăçлать вăл. Тĕп хуларан аптекăна тĕрĕслевпе килсен те Машăн ĕçне лайăх хак çеç панă. Çав вăхăтрах аптекăра ирттерекен мероприятисене хастар хутшăннă вăл, санитарипе гигиена ĕçне те вăлах ертсе пынă. Пурнăçри тĕрлĕ сăлтавсене пула манăн анне тĕп хулари пĕр аптекăра та икĕ çул тăрăшса ĕçлет. Анчах та шăпа ăна каялла хăй çуралнă тăван кĕтесех туртать. Хальхи вăхăтра Мария Петровна «Строитель» ООО аптека пунктĕнче ертỹçĕ ĕçне пурнăçлать, ăна кулленхи ĕçре Ольга Быкова пулăшса пырать. Хăй патне килнĕ пациентсене тулли те тĕрĕс хуравсем парса ăсатать, çамрăкпа çамрăк, ватăпа ватă пулса пĕр чĕлхе тупаять вăл. Эпĕ хамăн аннепе чăннипех те мухтанатăп. Вăл икĕ хутчен пĕрремĕш квалификаци, пĕр хутчен аслă квалификаци категорие тивĕçнĕ. Çуллахи вăхăтра çурт умĕнчи пахчара хитре чечексем ỹстерет, тĕрлĕрен пахчаçимĕç туса илет. Хĕллехи вăхăтра вара çыхма, тĕрлеме юратать. Хăйпе пĕрле ĕçленĕ С.Антонова, Н.Декаева, В.Калашникова фармацевтсене ĕçре пулăшса пынишĕн, вĕрентсе ăс панишĕн тав сăмахĕ калать вăл. Çапла паянхи кун тĕлне аннен ĕç стажĕ 31 (!) çулпа танлашать. Ĕç кĕнеки çинче тав сăмахĕсем çырнă йĕркесене те курма пулать, Хисеп грамотисем те пур унăн. Эпĕ вара, унăн хĕрĕ пулнă май, тĕнчери чи хаклă та çывăх, пурнăçра ăс парса, вĕрентсе пыракан аннене çуралнă кунĕ ячĕпе ăшшăн-ăшшăн саламлатăп. Сывлăхпа телей яланах юнашар пулччĕр, юратнă аннеçĕм! Питỹнте савăнăç куççулĕ çеç йăлтăртаттăр. Малашнехи ĕçре, пурнăçра çитĕнỹсем çеç пулччĕр.
О.ЛЕВЕНДЕЕВА.
Шăмăршă ялĕ.