Публикации » Министр район пурнăçĕпе паллашнă

15 июля 2015 г.

Июлĕн 11-мĕшĕнче Шăмăршăра ĕçлĕ çулçỹревпе Чăваш Республикин Министрсен Кабинечĕн Председателĕн çумĕ - Сывлăха сыхлас ĕçпе социаллă аталану министрĕ Алла Самойлова пулнă. Унпа пĕрле район администрацийĕн пуçлăхĕ Валерий Фадеев çỹренĕ. Чăн малтанах вĕсем Шăмăршăра ваттисемпе инвалидсем валли тăвакан вăхăтлăх пурăнмалли уйрăмра ĕçсем мĕнле пынипе паллашнă. Алла Владимировна ертỹçĕсене ĕçе хăвăртлатма, объектри вак-тĕвек ĕçсене паян-ыранах вĕçлеме чĕнсе каланă. «Çак уйрăма уçма çине тăрса хатĕрленмелле, вăхăт питĕ сахал юлчĕ, васкавлăрах ĕçлемелле», - тенĕ министр. Алла Самойлова çавăн пекех районти тĕп больницăна çитсе курнă, ача-пăча консультацийĕнче ĕçлекен медперсоналпа тĕл пулса калаçнă. Район больницин тĕп врачĕ Ирина Смирнова халăх сывлăхне сыхлас ĕçе мĕнле йĕркеленипе паллаштарнă.