Публикации » Кашни çурт хăтлă пултăр

15 июля 2015 г.

Шăмăршă районĕнчи пурăнмалли çурт-йĕр фондĕнче нумай хваттерлĕ 51 çурт шутланать, вĕсене ятарласа лицензи илнĕ управляющи компанийĕ пăхса-юсаса тăрать. Хальхи вăхăтра нумай хваттерлĕ çуртсене 2015-2016 çулсенчи хутса ăшăтмалли сезона хатĕрлеççĕ. Шывпа тивĕçтермелли сетьсен 65 процентне, канализацин 65 процентне юсанă. Кăçал хăшпĕр нумай хваттерлĕ çуртсен çивиттийĕсене - пурĕ 790 тăваткал метр - çĕннипе улăштарнă. Çак тата ытти ĕçсемпе паллашнă та ĕнтĕ июлĕн 11-мĕшĕнче пирĕн района ĕçлĕ çулçỹревпе килсен Чăваш Республикинчи патшалăхăн пурăнмалли çурт- йĕр инспекцийĕн ертỹçи - Чăваш Республикинчи патшалăхăн пурăнмалли çурт-йĕрĕн тĕп инспекторĕ Сергей Димитриев. Унпа пĕрле район администрацийĕн пуçлăхĕ Валерий Фадеев çỹренĕ. Сергей Димитриев Шăмăршăри Космовский урамĕнчи 7, 9 тата 11 номерлĕ çуртсенче пурăнакансемпе тĕл пулса калаçнă, пурăнмалли çурт-йĕр условийĕсемпе интересленнĕ. Уçă калаçу вăхăтĕнче тĕп инспектор çынсен ыйтăвĕсем çине тулли хурав панă.

С.ИВАНОВ.