15 июля 2015 г.
«ЧĂВАШ РЕСПУБЛИКИНЧЕ 2014 çулта ĕç сыхлавĕпе ĕç условийĕсем мĕнле шайра пулни çинчен» Патшалăх доклачĕпе тимлĕн паллашрăм. Доклад 12 пайран тăрать. Пĕрремĕш пайра Чăваш Республикинчи социаллă партнер системинчи ĕç сыхлавĕ пирки каланă. Республикăра социаллă тата ĕçлĕ çыхăнусене йĕркелесе тăракан отрасльсенчи 34 килĕшỹ ĕçлет, вĕсенчен 26-шĕ - социаллă сферăра. Иртнĕ çул Чăваш Енре пуçласа коммерциллĕ мар организацисем хушшинче социаллă проектсен конкурсне ирттернĕ. Докладăн иккĕмĕш пайĕнче 2014 çулта ĕç сыхлавне ертсе пырас ĕçри патшалăх системин аталанăвĕ пирки каланă. Кунта ĕç условийĕсемпе ĕç сыхлавĕн мониторингĕн аталанăвĕ тата ку ĕçре информаци технологийĕсем пурнăçа кĕни çинчен çырнă. Виççĕмĕш пайра федерацири ĕç тăвакан влаçăн территорири органĕсен ĕçĕ-хĕлĕпе, вĕсем ĕç сыхлавĕнче надзорпа контроль ĕçне мĕнле туса пынипе паллаштарнă. Сăмахран, 2014 çулта ĕç сыхлавĕн законодательствине мĕнле пăхăннине пĕлес тĕллевпе 846 тĕрĕслев ирттернĕ, саккуна пăснă 3746 тĕслĕх тупса палăртнă. Тăваттăмĕш пайра ĕç сыхлавне муниципалсем енчен мĕнле ертсе пынине тишкерсе тухнă. Нумай çĕрте, çав шутра хамăрăн Шăмăршă районĕнче те ĕç сыхлавĕпе уйăхлăхсем, семинарсем, канашлусем, «çавра сĕтел» хушшинчи тĕлпулусем, смотр-конкурссем иртеççĕ. Пиллĕкмĕш пайра Чăваш Енри производство травматизмĕ мĕнле шайра пулни çинчен каланă. Пирĕн республика производствăри травматизм хисепĕпе Атăлçи федерацин округĕнче чăн кайри вырăнсенчен пĕрне йышăнни савăнтарать. Улттăмĕш пай ĕç условийĕсене лайхăлатассипе çыхăннă, çиччĕмĕш пайра професси чирĕсемпе чирлекен инвалидсен шайне тишкерсе тухнă. 2014 çул кăтартăвĕсем тăрăх республикăра, çав шутра хамăрăн Шăмăршă районĕнче те професси чирĕсемпе чирлекенсен шучĕ нумай чакнă. Докладăн саккăрмĕш пайĕнче ĕç сыхлавне лайăхлатма ирттерекен мероприятисем валли мĕн чухлĕ укçа-тенкĕ уйăрни çинчен каланă. Ку тĕлĕшпе республикăра 1,2 миллиард тенкĕ (2013 çулхипе танлаштарсан - 109,1 процент) тăкакланă. Тăххăрмĕш пайра ĕç условийĕсене социаллă хак парассин условийĕсем лайăхланса пыни çинчен каланă. Вуннăмĕш пайра ĕç сыхлавĕн вĕренĕвне мĕнле йĕркеленипе паллаштарнă. 2014 çулта республикăра 9474 çынна (2013 çулта - 8053) ĕç сыхлавĕн правилисене вĕрентнĕ. Вунпĕрмĕш пай ĕç сыхлавне информаци енчен мĕнле тивĕçтернипе, вуниккĕмĕш пай 2015 çулта умра тăракан тĕп тĕллевсемпе паллаштараççĕ.
В.МАТВЕЕВ,
Гостехнадзорăн Шăмăршă районĕнчи тĕп инспекторĕ.