15 июля 2015 г.
Июль уйăхĕн пуçламăшĕнче Чăваш Республикин Правительствин Пĕтĕм Раççей ялхуçалăхĕн 2016 çулхи çыравне хатĕрленсе ирттерес енĕпе ĕçлекен комиссийĕн ларăвĕ пухăннă. Курав конференцийĕ мелĕпе йĕркеленĕ ĕçлĕ калаçăва район-хула администрацийĕсен ертỹçисем хутшăннă, ăна Чăваш Республикин Министрсен Кабинечĕн Председателĕ Иван Моторин ертсе пынă. Кун йĕркинче пĕрремĕш ыйтупа - ялхуçалăх çыравне хатĕрленсе чи малтан пурнăçламалли мероприятисемпе - Чăвашстат ертỹçин çумĕ Любовь Петрова паллаштарнă. Федерацин «Пĕтĕм Раççей ялхуçалăхĕн çыравĕ çинчен» саккунĕпе килĕшỹллĕн ăна çĕршывра вунă çулта пĕр хутран кая мар йĕркелемелле. Юлашки çырав 2006 çулхи июль уйăхĕн 1-25-мĕшĕсенче пулнă. Унăн пĕтĕмлетĕвĕсене тĕпе хурса асăннă отрасле 2008-2012 çулсенче вăй илтермелли патшалăх программине хатĕрленĕ.Раççей Федерацийĕн Правительствин 2013 çулхи апрель уйăхĕн 10-мĕшĕнчи 316-мĕш йышăнăвĕпе черетлĕ çырав çитес çулхи июль уйăхĕн 1 - август уйăхĕн 15-мĕшĕсенче иртмелле. Тĕллевлĕ çĕршывăн ялхуçалăх тытăмĕ тата тăрăмĕ, ресурс хăвачĕ (çĕр лаптăкĕ, акса-лартса тăвакан уй-хир, сад, выльăх-чĕрлĕхпе кайăк-кĕшĕк йышĕ) çинчен чăнлăхпа килĕшсе тăракан кăтарту пухассипе, статистикăн суйласа илсе тĕпчев ирттермелли тытăмне çĕнетессипе çыхăннă. Пур енлĕ тишкерỹ шутланакан çырав ялхуçалăхĕн мĕнпур аспектне пырса тивет тата вĕсене аталантармалли прогноз тума, тавар кăларакансене патшалăх пулăшăвĕпе тивĕçтермелли çĕнĕ мерăсем çирĕплетме кирлĕ информаци пухма май парать. Любовь Арвидсовна палăртнă тăрăх - пулас çыравăн программине 2006 çулхинчен улăштарнă, объектсем тăрăх информаци илмелли меслетлĕхпе мелсене çĕнетнĕ, хуравламалли ыйтусене анлăлатнă. Кăтартусене хỹтлĕхпе тивĕçтереççĕ, çырав хучĕнче уйрăм çыннăн ячĕ-шывне, адресне палăртмаççĕ, хуравсен чăнлăхне тĕрĕслемеççĕ. Çыравçăсем планшетлă компьютерсемпе усă курĕç. «Пĕтĕм Раççей ялхуçалăхĕн 2016 çулхи çыравĕччен çулталăк юлчĕ, ăна çỹллĕ шайра ирттересси влаçăн мĕнпур тытăмĕ вăйсене пĕрлештернипе тата респондентсем асăннă тĕпчеве ăнланса йышăнассипе тỹрремĕнех çыхăннă. Çакăн пирки манмалла мар», - пĕтĕмлетнĕ Чăвашстат ертỹçи Эльвира Максимова.