15 июля 2015 г.
.jpg "Ун пек çынсем пурнăçа илемлетеççĕ")
Юратнă ĕç вырăнне илсе каякан сукмака чĕрĕк ĕмĕр ытла такăрлатакансем - телейлĕ те чăтăмлă çынсем. Çакнашкал йышра тăракансенчен пĕри - Шăмăршă вăтам шкулĕнчи Л.Семенова учительница. Унăн педагог стажĕ 28 çулпа танлашать. Аслă категориллĕ учительница хăйĕн тивĕçне яланах чун- чĕре ăшшипе, професси ăсталăхĕпе пурнăçлать, чăваш чĕлхи урокĕсене çỹллĕ методика шайĕнче ирттерет. Людмила Алексеевна пĕрлех районти чăваш чĕлхипе литературине вĕрентекенсен методика пĕрлешĕвне те ăнăçлă ертсе пырать. Тутарстанри Çĕпрел районĕнчи Чăваш Ишлĕ хĕрĕн педагог стажĕ 1987 çулта, Чăваш патшалăх университечĕн чăваш чĕлхипе литературин уйрăмне пĕтернĕ хыççăн, Виçпỹрт Шăмăршă шкулĕнче пуçланнă. Чун килĕштернĕ ĕçре Людмила Алексеевна творчество хавхаланăвĕпе вăй хунă, каçсерен ятарлă литература та нумай вуланă. Ĕç опычĕ çулран-çул ỹссех пынă. Унăн вĕренекенĕсем çирĕп пĕлỹпе палăрнă, районти олимпиадăсенче лайăх результатсем кăтартнă. Çамрăк учительница тулли мар вăтам шкулта ачасен драма тата фольклор кружокĕсене те йĕркелесе янă. Вĕренекенсен спектаклĕсемпе концерчĕсене ачасем те, çитĕннисем те яланах ăшшăн йышăннă. Людмила Алексеевна шкулти педагогсен профсоюз комитетне те ертсе пынă, ялти «Сурпан » фольклор коллективĕнче юрланă. Шăпах çак коллективра учительница пулас мăшăрĕпе - колхозăн инженер-механикĕпе Александр Семеновпа паллашнă. Пĕр-пĕрне чунтан килĕштерекен çамрăксем 1989 çулта пĕр çемьене пĕрлешнĕ. Виçпỹрт Шăмăршă шкулĕнче 23 çул ĕçленĕ хыççăн, 2010 çулта Л.Семенова Шăмăршăри вăтам шкула куçнă. Çак шкулта Людмила Алексеевна пуçламăш тата вăтам классенче чăваш чĕлхине вĕрентет. Вырăспа чăваш шкулĕсен ятарлă прог-раммипе ĕçлесе, вăл хальхи педагогикăри технологисемпе туллин усă курма, чăвашлăха малалла аталантарма тăрăшать. Кашни ачапа уйрăммăн ĕçлессине, вĕсен пĕлỹ шайне ỹстерессине, вĕренекенсене районти, республикăри конкурссемпе фестивальсене тата олимпиадăсене явăçтарассине тĕп вырăна хурать. Юлашки 3 çулта Л.Семенован вĕренекенĕсем чăваш чĕлхин республикăри олимпиадинче тата «Туслăх хĕлхемĕ» фестивалĕнче 1-3 вырăн çĕнсе илнĕ. Вĕсем малтан районти чăваш чĕлхи олимпиадинче мала тухнă пулнă. Людмила Алексеевна район хаçачĕпе те тачă çыхăну тытать. Унăн статйисемпе тĕрленчĕкĕсем тата сăввисем «Шăмăршă хыпарĕнче» тăтăш пичетленеççĕ. 2015 çул Людмила Алексеевнăшăн тепĕр паллă пулăмпа та асра юлĕ. Семеновсен туслă çемйи, Леонид Якубович ятарласа чĕннипе, «Поле чудес» телепередачăна хутшăнчĕ, хаклă парне çĕнсе илчĕ. Чăвашла тумланнă, тăван халăх юрри-такмакне илемлĕн шăрантаракан çемьен пултарулăхне миллионшар çын ытараймасăр пăхрĕ. Пĕр сăмахпа каласан, Семеновсем Шăмăршă районĕн чапне çеç мар, Чăваш Ен ятне-сумне çĕклерĕç. Л.Семенова - РФ Писателĕсен пĕрлешĕвĕн членĕ. Унăн Шупашкарта «Телей палли» тата «Чун-чĕре кĕввисем» ятпа сăвăсен кĕнекисем пичетленсе тухнă. Иккĕмĕш кĕнеки республикăри хĕрарăм çыравçăсене парса чыслакан Эмине премине тивĕçнĕ. Педагогика отраслĕнчи йывăр та пархатарлă ĕçшĕн аслă категориллĕ учительницăна Чăваш Республикин Вĕрентỹ министерствин, район администрацийĕн тата районти вĕрентỹ пайĕн Хисеп грамотисемпе наградăланă. Çак кунсенче Л.Семенова çуралнăранпа 50 çул çитрĕ. Чаплă юбилей ячĕпе ăна юратнă мăшăрĕ, Марияпа Дария хĕрĕсем тата ывăлĕ Семен, тăванĕсем, ĕçтешĕсем, вĕренекенĕсем ăшшăн саламларĕç, ырлăх-сывлăх, вăрăм ĕмĕр, педагог ĕçĕнче малашне те хавхаланса ĕçлеме ăнăçу сунчĕç.
И.АНАНЬЕВ.