15 июля 2015 г.
Асанкассинчи О.Драгунова Пăчăрлă Пашьелĕнчи вăтам шкулта вĕреннĕ çулсенче шкулта тата ялти клубра иртекен культура мероприятийĕсене активлă хутшăннă. Аслă классенче вĕреннĕ тапхăрта çак туртăм татах та вăйланнă. Яштака пỹ-силлĕ, илемлĕ сăн-питлĕ, сарă çивĕтлĕ хĕр концертсенче хавхаланса юрланă-ташланă, çĕкленỹллĕ кăмăлпа сăвăсем вуланă, сценкăсенчи сăнарсене витĕмлĕн калăпланă. - Вăтам шкул пĕтерес умĕнхи çул эпир Шупашкарти аслă вĕренỹ заведенийĕсенче йĕркеленĕ «Уçă алăксен кунĕн» меропиятийĕнче пултăмăр, - каласа парать К.В.Иванов ячĕллĕ Чăваш академи драма театрĕн артистки О.Драгунова. - Чăваш патшалăх культурăпа искусствăсен институтĕнче пире хамăр районта çуралса ỹснĕ Валерий Яковлев ертсе пыракан актерсен студийĕпе те паллаштарчĕç. Театр уйрăмĕн студентки пулас ĕмĕт мана тỹрех çунатлантарса ячĕ. Киле таврăнсан артистка пулас шухăшăма аттепе анне ырларĕç. 2007 çулта аттестат илсен мал ĕмĕтлĕ хĕр çак института тивĕçлĕ документсем тăратнă, вĕренме кĕмелли экзаменсене те ăнăçлă тытнă. Çав çул пĕрлех Анат Чаткасри Е.Урдюков та театр студийĕн студенчĕ пулса тăнă. Театр ăсталăхне чăтăмлăн туптанă выпускниксем 2011 çулта драмăпа кино актерĕн дипломне илнĕ. Чăваш уйрăмне пĕтернĕ тăватă хĕрпе виçĕ каччăна Чăваш академи драма театрне ĕçлеме янă. О.Драгунован театрти пĕрремĕш ĕçĕ - «Пĕртен-пĕррескерĕм» мелодрамăри (Л.Сачкова) Анюта ролĕ. Çамрăк актриса хăйĕн рольне чуна хумхантарса ăста вылянине тỹрех асăрханă куракансем. Малалла вара режиссерсем ăна «Икĕ каччăн пĕр шухăш» комедири (П.Осипов) Лисук, «Килех килчĕ Тур çырни» комедири (А.Пăртта) Вероника, «Мунча кунĕ» комедири (А.Тарасов) Мариша, «Ашшĕн ачисем» драмăри (С.Найденов) Лена, «Чухăнлăх вăл инкек мар» комедири (А.Островский) Лиза ролĕсене шанса панă. Режиссерсен шанăçне тỹрре кăларса Асанкасси хĕрĕ çак сăнарсене те чылайлăха асра юлмалла калăплать. Кăçал К.В.Иванов çулталăкне халалласа театрта чăваш поэзийĕн классикĕн пурнăçĕпе, ĕçĕ-хĕлĕпе паллаштаракан «Вĕри юнлă çемçе чун» драмăна (И.Максимов-Кошкинский) та кун çути кăтартнă. СССР халăх артисчĕ В.Яковлев режиссер лартнă юрă-ташăллă спектакль премьерине куракансем ăшшăн йышăннă. Çак спектакльте О.Драгунова Константин Ивановăн юратнă савнине - Праски рольне питĕ ăнăçлă вылять. Вилĕмсĕр поэт рольне вара В.Карпов артист сăнарлать. Паллă режиссер çакнашкал яваплă роль шанса пани, Оксанăн актриса пултарулăхне яр-уççăн çирĕплетет. Кунсăр пуçне вăл «Дон Жуан» (А.Пушкин), «Ялта» (Ф.Павлов) спектакльсенчи сăнарсене те витĕмлĕн уçса парать. Пирĕн республикăра профессилле театрсем хушшинче çулленех «Чĕнтĕрлĕ чаршав» конкурс йĕркелеççĕ. 2012 çулта çак конкурсра О.Драгунова «Хĕрарăмсен рольне чи ăста вылякан» номинацире çĕнтерỹçĕ пулса тăнă. Хамăрăн пултаруллă ентешĕмĕре О.Драгунована искусствăн вĕç-хĕррисĕр анинче малашне те творчество хавхаланăвĕпе ĕçлеме ăнăçу сунатпăр.
И.МЕДВЕДЕВ.