22 июля 2015 г.
2012 çулхи июлĕн 27-мĕшĕнче чикан çынни П.Николаенко ВАЗ- 2101 автомашинăпа ир-ирех Çĕрпỹрен Ульяновск еннелле кайма тухнă. Водительсĕр пуçне салонра тата икĕ чикан çынни ларса пынă. П.Николаенко Виçпỹрт Шăмăршă тĕлĕнче тепĕр автомашинăран иртсе кайма шутланă, анчах çак вăхăтра, çул-йĕр правилине пăснине пула, тепĕр «Жигулие» пырса тăрăннă. П.Николаенкопа юнашар ларса пынă пассажир, йывăр суранланнăскер, вырăнтах вилсе кайнă. Хыçалти чикан вара, йывăр аманнăскер, район больницинчи реанимаци уйрăмĕнче пурнăçран уйрăлнă... Водителĕн айăпне пула икĕ çын вилнĕ. П.Николаенко хăй йывăрах суранланман. Вăл больницăра выртнă вăхăтра, саккунпа килĕшỹллĕн, РФ УКĕн 264 статйин 5-мĕш пайне тĕпе хурса, ун пирки уголовлă ĕç пуçарнă. Паллах, следователь кун пирки йывăр авари тунă çынна хăйне те пĕлтерсе хунă. Анчах та П.Николаенко, тивĕçлĕ айăплавран хăтăлас тесе, никама систермесĕр, сывалса çитмесĕрех больницăран тухса шăвăннă, 3 çул хушши тарса çỹренĕ. Шыраври чикан кăçалхи çуркунне Сальск хулинчен Оренбург облаçĕнчи Бузулук хулине чукун çулпа кайма билет илни паллă пулнă. Кун пирки полицин Шăмăршă районĕнчи уйрăмне информаци çитнĕ. Пирĕн сотрудниксем вара тỹрех çула тухнă. Вĕсем шыраври чикан çыннине Самарăри чукун çул станцийĕнче тытса чарнă, ăна арестлесе полици уйрăмне лартса килнĕ.Нумаях пулмасть Патăрьел сучĕн ларăвĕ иртнĕ. Унта П.Николаенкона 3 çуллăха условнăй майпа ирĕкрен хăтарма йышăну кăларнă. Çапла вара, чикан çынни тивĕçлĕ айăплав илнĕ.
А.МАНДРЮКОВ,
полици уйрăмĕн аслă следователĕ.