29 июля 2015 г.
Çапла, çапла - августăн 19-мĕшĕнче район пĕлтерĕшлĕ кăна мар, республика пĕлтерĕшлĕ çеç те мар, кỹршĕллĕ Ульяновск облаçĕшĕн те пысăк пĕлтерĕшлĕ уяв иртет Шăмăршăра. Çак уяв пирки тĕплĕнрех каласа пама район администрацийĕн пуçлăхĕн çумĕнчен - социаллă аталану пайĕн ертỹçинчен Владимир ПЕТьКОВРАН ыйтрăмăр.
- Владимир Александрович, район пысăк уява хатĕрленни çинчен пĕлетĕп-ха. Хамăрăн вулакансене - район çыннисене те пĕлтерес килет...
- Августăн 19-мĕшĕнче Ульяновск облаçĕн Чăваш Енри Кунĕ иртмелле, çак анлă пĕлтерĕшлĕ мероприятие республика пуçлăхĕсем Шăмăршă районĕнче ирттерме йышăнни - пирĕншĕн питĕ пысăк чыс. Çак куна хатĕрленсе, район центрне тата çывăхри ялсене тасатса-тирпейлесе тухмалла, илемлетмелле, уяв сăнĕ кĕртмелле.
- Кун йĕркипе кĕскен те пулин паллаштараймăр-ши?
- Çак кун чаплă лару- тăрура Шăмăршăри виçĕ хутлă 24 хваттерлĕ çĕнĕ çурта куçакансене çăра уççисем парăпăр. Çавăн пекех Шăмăршăра ветерансем валли вăхăтлăх пурăнмалли 30 вырăнлă çĕнĕ çурт уçăлмалла. «Шăмăршă районĕнчи централизациленĕ клуб системи» автономи учрежденийĕн çуртĕнче - Культура Керменĕнче - «Чувашско-Симбирское поликультурное пространство: итоги и перспективы» темăпа çавра сĕтел йĕркелеççĕ. Çак ĕçе Чăваш Республикин Культура, национальноçсен ĕçĕсен тата архив ĕçĕн министерстви ертсе пырĕ. Культура Керменĕн пĕрремĕш хутĕнче Раççейри Литература çулĕпе Чăваш Енри К.В.Иванов çулталăкне халалланă кĕнеке выставки, иккĕмĕш хутра картинăсен выставки ĕçлĕç.
- Шăмăршăри ипподромра уяв малалла тăсăлать пулĕ...
- Çапла, Шăмăршă ипподромĕнче культурăпа спорт мероприятийĕсем иртĕç. Чăваш Республикин Культура, национальноçсен ĕçĕсен тата архив ĕçĕн министерствипе Физкультурăпа спорт министерстви уяв программине туса хатĕрленĕ ĕнтĕ. Сăмахран, лаша спорчĕн ăмăртăвĕсене Ульяновск облаçĕнчи тата хамăр республикăри чи вăйлă урхамахсем хутшăнĕç. Çавăн пекех чăваш нацийĕн «Кĕрешỹ» ăмăртăвĕ, волейбол вăййипе юлташла турнир иртĕç. Ипподромра Чăваш Республикинчи тата Ульяновск облаçĕнчи, Шăмăршă районĕнчи ял тăрăхĕсен хăна çурчĕсем вырнаçĕç, чи пултаруллă фольклор ушкăнĕсем юрă-ташăпа савăнтарĕç. Кунтах суту-илỹ ярмăркки ĕçлĕ, ача-пăча вылямалли площадкăсем те йĕркелетпĕр. Тỹрех каламалла, уява хатĕрленес тĕлĕшпе тĕп ĕçсене район администрацийĕн, район территорийĕнче вырнаçнă предприятисемпе организацисен вăйĕпе пурнăçламалла. Канмалли кунсенче те ĕç пырĕ. Чаплă хăнасене - уява Чăваш Республикипе Ульяновск облаçне ертсе пыракансем те килеççĕ - тивĕçлипе кĕтсе илер, хамăр района лайăхпа çеç кăтартар, ырă кăмăлпа ăсатса ярар. Уяври тĕлпулусем икĕ регион хушшинчи тăванла çыхăнусене малалла çирĕплетессе шанса тăратпăр.
И.САЛАНДАЕВ калаçнă.