01 августа 2015 г.
ПИРĔН республикăра «Çул çитмен çамрăк» профилактика операцийĕ йĕркелесси йăлана кĕчĕ ĕнтĕ. Саккун йĕркисене пăсас туртăмлă ачасене, яшсене преступлени тăвассинчен асăрхаттарассинче, право тĕлĕшĕнчи ăнлантару ĕçне пурнăçлассинче Чăваш Республикин Шалти ĕçсен министерствин çакнашкал мероприятийĕн пĕлтерĕшĕ калама çук пысăк. Профилактика операцийĕн пĕрремĕш тапхăрĕ июнĕн 20-30-мĕшĕсенче иртрĕ. Полицин çул çитменнисемпе ĕçлекен инспекцийĕн, участковăй уполномоченнăйсен службин сотрудникĕсем, районти çул çитменнисемпе ĕçлекен тата вĕсен прависене хỹтĕлекен комисси членĕсем çак тапхăрта тĕрлĕ ялсене çитрĕç. Вĕсем полици уйрăмĕнче учетра тăракан ачасемпе, право йĕркисене пăсас туртăм пур çул çитмен ытти яшсемпе тĕл пулса калаçрĕç, тỹнтерле ĕç тăвасран асăрхаттарчĕç, вĕсем каникул кунĕсене мĕнлерех ирттернипе кăсăкланчĕç. Хăйсен ачисене кирлĕ пек пăхма тăрăшман ашшĕ-амăшĕ патĕнче те пулчĕç профилактика рейдне тухнисем, вĕсемпе ăнлантару ĕçне пурнăçларĕç, куçран вĕçертнĕ ачасем тỹнтерле ĕç тума пултарни çинчен каларĕç. Операцин пĕрремĕш тапхăрĕнче ашшĕ-амăшĕ пирки 5 протокол, çул çитмен çамрăк обществăлла вырăнсенче ỹсĕр çỹренĕ пирки пĕр протокол çырса район администрацийĕн çул çитменнисемпе ĕçлекен, вĕсен прависене хỹтĕлекен комиссие тăратнă. Комиссин черетлĕ ларăвĕнче вĕсене тĕплĕн пăхса тухнă, тивĕçлĕ мерăсем йышăннă. Июлĕн 13-мĕшĕнчен пуçласа июлĕн 23-мĕшĕччен вара «Çул çитмен çамрăк» операцин иккĕмĕш тапхăрне йĕркеленĕ. Рейдсем вăхăтĕнче пурĕ 6 протокол çырнă. Вĕсенче 5-шĕ ашшĕ-амăшĕ хăйсен ачисене тивĕçлĕ тимлĕх уйăрманнипе, çул çитмен пĕр çамрăк алкоголь шĕвекĕ ĕçнипе çыхăннă. Çак протоколсене те çỹлерех асăннă комиссие тăратнă. Августăн 3-мĕшĕнче операцин виççĕмĕш тап- хăрĕ пуçланать. Çавна май рейдсем ирттерме хатĕр- ленетпĕр. Çак тапхăр августăн 13-мĕшĕччен пырать.
Н.МАЗЯКОВА,
полицин çул çитменнисемпе ĕçлекен инспекторĕ.