01 августа 2015 г.
МЧС службин республикăри тĕп управленийĕн тата «Чăваш Республикин пушарпа кĕрешекен службин» пĕрлехи мероприятийĕсен планĕпе килĕшỹллĕн çак кунсенче Канашра пушарта тĕтĕм-сĕрĕмрен хỹтĕленес, условнăй пушара сỹнтерес тĕлĕшпе ăмăрту иртрĕ. унта пурĕ 10 пушар чаçĕн, çав шутра пирĕн район команди те, ăмăртрĕ. Командăсем малтан теорилле ыйтусем çине хуравларĕç. Ăмăртусен иккĕмĕш тапхăрĕнче вара вĕсем пушар вăхăтĕнче тăхăнмалли тумтир тата тĕтĕм- сĕрĕмрен хỹтĕленмелли маска тăхăнса, чăрмавсем витĕр тухса вут-хĕм еннелле вирхĕнчĕç, ун çине 10 метртан пушар сỹнтермелли хатĕрпе пĕрĕхрĕç. Ăмăртусен кăтартăвĕсем тăрăх Шăмăршăри 42-мĕш пушар чаçĕн команди - ун йышĕнче В.Масленников (командир), А.Ефремов, А.Фомин тата Н.Положин пулчĕç - хисеплĕ виççĕмĕш вырăн йышăнчĕ. Вăрнарсемпе йĕпреçсем пĕрремĕшпе иккĕмĕш вырăн çĕнсе илчĕç. Кунта çакна та палăртмалла: В.Масленников теори ыйтăвĕсене хуравлас тĕлĕшпе çак ăмăртусенче чи вăйли пулчĕ. 10 ыйту çине те вăл тулли хуравсем пачĕ. Професси ăсталăхĕн ăмăртăвĕсенче лайăх кăтартусемпе палăрнă ятпа хамăрăн пушар чаçĕн командин ĕçченĕсене ăшшăн саламлатпăр, ĕçре, ытти яваплă конкурссенче ăнăçу сунатпăр.
А.НИЗАМОВ,
районти пушар чаçĕнчи профком председателĕ.