05 августа 2015 г.
Район администрацийĕн ялхуçалăхĕпе экологи пайĕ вырма вăхăтĕнче çарти штаба аса илтерет. Хуçалăхсенче миçе гектар тырă пуçтарса кĕртнине, выльăх апачĕ мĕн чухлĕ хывнине, кĕр тыррисем акма миçе гектар çĕр хатĕрленине кунта тĕплĕн пĕлме пулать. Хĕрỹ кунсенче уяв çинчен те манса каятăн. Акă августăн 7-мĕшĕнче тĕп специалист-эксперт, районти эколог Виталий Борисович Давыдов 55 çул тултарать иккен. Хаçатăн çывăх тусĕ вăл, статья çырнă чух журналистсене тĕрлĕ цифрăсем самантрах тупса парать. Малтан Вăрнарти совхоз-техникумран, ун хыççăн Чăваш ялхуçалăх институтĕнчен (халĕ - академи) вĕренсе тухнă, ку должноçра 13 çул тăрăшать. Пĕр вырăнта ларма-тăма пĕлмен хĕрỹ çын вăл, Виталий. Лайăх юлташ та. Пĕрле ĕçлекенсем ăна хисеплеççĕ, унăн сăмахне шута илеççĕ. Районти ялсенче тирпей-илем пултăр, тăпра эрозийĕ ан сарăлтăр тесе нумай тăрăшать тĕп эколог. Кашни çын çутçанталăка юраттăр тесе халăхпа тĕл пулса калаçать, çамрăк ăрăва экологи воспитанийĕ пама хастар хутшăнать. Çуралнă кунупа саламлатпăр сана, Виталий Борисович! Çирĕп сывлăх, телей, вăрăм ĕмĕр сунатпăр.
И.АНАТКАС.