08 августа 2015 г.
«Советская Чувашия» хаçатăн, «Чувашия» ГТРК тата Наци телерадиокомпанийăн «Пирĕн Республика. Тĕп тема» медийнăй проекчĕн тăсăмĕ - Чăваш Республикин Пуçлăхĕн тивĕçĕсене вăхăтлăх туса пыракан Михаил Игнатьев Шупашкарти стройплощадкăсемпе Красноармейски районĕнчи строительство керамики туса кăларакан «Кетра» завода ĕçлĕ çулçỹревпе çитсе курни. Телеэкрансем çинче çулçỹреве августăн 6-мĕшĕнче кăтартрĕç. Паян эпир хамăр хаçатра «Пурăнмалли çурт-йĕр» программа республикăра мĕнле пурнăçланни çинчен кĕскен çырса кăтартатпăр.
1. ĔÇЕ - ИКĔ СМЕНĂПА
«УНИВЕРСИТЕТСКАЯ - 2» микрорайонри строительство ĕçĕсем Чăваш Республикин Министрсен Кабинетне пурăнмалли çурт-йĕр строительствине пулăшакан Федераци фончĕ уйăрса панă çĕр çинче анлăн пыраççĕ. Кунта ĕçлеме ирĕк илес тĕлĕшпе ирттернĕ аукционра «ТУС» ЗАО çĕнтернĕ. Михаил Игнатьев «ТУС» строителĕсем чунтан тăрăшса ĕçленине хăйĕн куçĕсемпе курса ĕненчĕ. Строительство компанийĕн ертỹçин Николай Угасловăн мĕн кăтартмалли тата мĕн каламалли пурах. Черетлĕ çурта хута яма хатĕрлесе çитернĕ. Çиччĕмĕш хутри балконран анлă Атăл та, пĕтĕм стройка та алтупанĕ çинчи пек лайăх курăнаççĕ. Çитес ĕçлĕ çулçỹревре вара Михаил Игнатьева вунçиччĕмĕш хутран çак панорамăна кăтартма шантарчĕç - «Университетская-2» микрорайонра кунашкал çỹллĕ çуртсем те пулаççĕ. Çак микрорайонта 15 пин çын пурăнмалла, кунта пур йышши магазинпа йăла предприятийĕсем те пулĕç. Çитĕнекен çамрăк ăру валли 1600 вырăнлă шкул тата икĕ ача сачĕ тума палăртнă. Проектра - Пăр Керменĕ, футбол стадионĕ, пĕвеллĕ парк (тăрă шывра карас пулă та ĕрчетесшĕн). «ТУС» ЗАО физкультурăпа спорт комплексĕн строительстви валли уйăракан гранта та çĕнсе илес ĕмĕтлĕ. Пурăнмалли çуртсем патĕнчен Хыркасси еннелле 10 километр тăршшĕ велоçул хывма шутлаççĕ. 350 пин тăваткал метр пурăнмалли çурт-йĕр тума палăртнă пулсан, 130 пинне хута янă ĕнтĕ. Михаил Игнатьев каменщиксемпе тата монтажниксемпе уççăн калаçрĕ, вĕсем «вăрăм укçа» шыраса Мускава е ытти мегаполиссене кайма шутламанни, кунтах лайăх тỹлени çинчен савăнсах пĕлтерчĕç.
2. ЗАВОД МАРКИН ЧЫСĔШĔН
«ТУС» ЗАО строительство ĕçĕсене хăй туса кăларнă кирпĕчпе пурнăçлать. Строительство керамикин «Кетра» завочĕ Красноармейски ялĕ çывăхĕнче вырнаçнă. Завод продукцийĕ Европăри чи çỹллĕ шая тивĕçтерет. Пахалăхпа ăшă тытасси чи çỹллĕ шайра пулнин тĕп вăрттăнлăхĕ - трепелпа усă курни. Çакăн пек кирпĕчрен купаланă çур метр хулăнăш стена ăшă тытаслăхĕпе ахаль кирпĕчпе икĕ метр хулăнăш купаланипе танлашать.«Кетра» продукцине Чăваш Енри строительсем çеç мар, çĕршывăн ытти регионĕсенче те килĕштереççĕ. Заводри кăткăс производство процессне автоматсемпе роботсем пулăшнипе пурнăçлаççĕ.«СЧ» корреспонденчĕпе калаçнă май, Михаил Игнатьев çакна палăртрĕ: «Ĕç вырăнĕсем туса хунă. Заводра 130 çын ĕçлет, ĕç укçи вăтамран 25 пин тенке яхăн. Ялта пурăнакансемшĕн ку лайăх. Красноармейскинчи завод - производствăна хуларан яллă районсене илсе тухнин паха тĕслĕхĕ. Ялта пысăк тухăçлă ĕç вырăнĕсем йĕркелеме май парать. Çак опытпа эпир малашне те усă курăпăр».
3. АЧАСЕНЕ - ЧИ ЛАЙĂХХИНЕ
ШУПАШКАРĂН Чернышевский урамĕнчи виçĕ хутлă, 220 ача вырнаçмалăх садике Чăваш Республикин «Вĕрентỹ ĕçне 2012-2020 çулсенче аталантарасси » патшалăх программипе килĕшỹллĕн тăваççĕ. Михаил Игнатьев çак объектри ĕçсемпе те тĕплĕн паллашрĕ. Садик çуртне хăпарт-малли кирпĕче те «Кетра» заводра туса кăлараççĕ. Подрядчикĕ - Сергей Лаврентьев ертсе пыракан «Алза» общество. Сергей Лаврентьев республика ертỹçине объектри ĕçсем графика çирĕп пăхăнса пулса пынине пĕлтерчĕ. Пĕр вăхăтрах садик валли инвентарьпе оборудовани те туянаççĕ. Сĕтел-пукан - экологи тĕлĕшĕнчен таса материалтан хатĕрлени. Сентябрĕн 15-мĕшĕччен территорие типей-илем кĕртес ĕçе вĕçлесшĕн. Ун хыççăн садик ачасене те йышăнма пултарĕ. Хула генпланĕпе илĕшỹллĕн кунта шкул та пулмалла, пурăнмалли çуртсем те çĕкленмелле. «Кăçал пирĕн тата 5 садик хута ямалла», - тенĕ «СЧ» корреспондентне Михаил Игнатьев. Чăваш Енре демографи лару-тăрăвĕ лайăхланса пынă май, пĕтĕмĕшле пĕлỹ паракан шкулсем тума тытăнмалла. Çĕнĕ стройкăсем 2016 çулта старт илĕç.
4. ÇЫНСЕМ САВĂНЧЧĂР ТЕСЕ
ШУПАШКАРТИ Эльгер урамĕнчи тăхăр хутлă çуртра 117 çын çĕнĕ хваттер илнĕ. Вĕсене хăй вăхăтĕнче «Савва» компани улталанă пулнă. Тĕрĕслĕх çĕнтерчех!«Çĕнĕ хула» микрорайона та çĕнĕ пурнăç çитнĕ. Кунта та маларах Мускаври «Савва» компанин пĕр подразделенийĕ ултав çулĕ çине тăнă пулнă. Объектра халĕ тỹрĕ кăмăллă ĕçченсем - «Монолитстрой» ООО, «Инкост» ООО тата «Иско-Ч» ОАО тăрăшаççĕ. 2011 çултанпа вĕсем пурăнмалли 19 çурта хута янă, халĕ пĕр вăхăтрах нумай хутлă 10 çурт çĕкленет. «Çĕнĕ хула» «Раççейри çемьесене пурăнмалли çурт- йĕрпе тивĕçтересси» программăна кĕнĕ. «Иско-Ч» ОАО кунта 2017 çулхи июлĕн 1-мĕшĕччен экономкласс йышши 10 пин тăваткал метр пурăнмалли çурт-йĕр туса лартать. Пĕтĕмпе вара çак программăпа Чăваш Енре 210 пин тăваткал метр çурт-йĕр тумалла, тата пилĕк пин çемье çĕнĕ хваттер туянма пултарĕ.
(«Советская Чувашия» хаçатран).