15 августа 2015 г.
Энтĕрьел ялĕнчи мĕнпур ырă ĕç Михаил Трофимов староста пуçарнипе пулса пырать тесен пĕрре те йăнăшмăп. Урамсене тирпейлемелле-и - ял старости пуринчен малтан аллине шăпăр е кĕреçе тытать. Çынсем унран тĕслĕх илеççĕ. Акă, ялти масар карти, йывăçран тытнăскер, йăлтах юхăннăччĕ. Михаил Трофимов, халăхпа калаçса, тимĕртен çĕнĕ карта тытас ĕçе пуçарса ячĕ. Хамăр ял çынни Виталий Любимов предприниматель строительство материалĕсемпе тата укçа парса та пулăшрĕ. Çавăн пекех ял çыннисем те аяккине тăрса юлмарĕç. Чăнах та, хăшĕ-пĕри укçине шеллерĕ, ял масарĕ çинче тирпей-илем тума та тухасшăн пулмарĕ. Тимĕртен карта тытнă хыççăн масар хапхине те туса лартрăмăр. Каллех Михаил Трофимов старостăпа Виталий Любимов предприниматель ял-йыша ырă тĕслĕх кăтартрĕç. Халĕ масар çинче тирпейлĕ, хуларинчен те кая мар. Эпĕ, масар çинчи ĕçсене тỹрремĕнех хутшăннăскер, çак ырă ĕç валли укçа парса пулăшнă, карта тытма тата хапха тума кар тăрса тухнă ял çыннисене ваттисен ятĕнчен чĕререн тав тăватăп.
Н.ТИХОНОВ.
Энтĕрьел ялĕ.